Kishte nënshkruar kontratën e jetës që do t’i realizonte ëndrrën më të madhe në karrierë, por një udhëtim me avion privat nga Franca drejt Kardifit mund t’i ketë ndërprerë gjithçka në mes. Argjentinasi Emiliano Sala ka qenë pjesë e Nantës, ku disa vite më parë ka luajtur Ermir Lenjani apo edhe Lorik Cana. Mesfushori i Sionit, i gjendur me skuadrën helvete në Turqi për fazën përgatitore, e ka ndierë shumë këtë lajm dhe mediat zvicerane kanë raportuar se për një moment ai ka lënë stërvitjen.
Ermir Lenjani ka qenë një lojtar i rëndësishëm për Sionin në pjesën e parë të sezonit, ku edhe ka marrë rolin e s.ulmuesit, duke e udhëhequr me gola dhe asiste. Njohja dhe afrimiteti me argjentinasin në periudhën kur kanë luajtur bashkë te Nanta, ka bërë që shqiptari ta përjetojë keq lajmin për zhdukjen e tij. “Jam i pafuqishëm. Nuk e besoj dot ende që është e vërtetë diçka e tillë”, ka thënë futbollisti i Kombëtares për “Blick”, teksa ka lënë përpara kohe stërvitjen. Raportet njerëzore janë të rëndësishme, sidomos në momente kur bëhet fjalë për humbje drastike, ndaj edhe për futbollistin kuqezi është koha që Sala të kujtohet për meritat dhe cilësitë që ka pasur.
“Nuk mund të thuash se ka qenë futbollisti më i mirë në botë, ama ishte vërtet luftëtar. Një njeri me dëshirë dhe vullnet për të punuar shumë që të arrijë ëndrrat e tij. Dhe për fat, me Nantën iu mundësua ëndrra dhe dëshira e tij më e madhe që të luante në Angli”, ka vijuar Lenjani rreth ish-shokut të skuadrës te Nanta.
NJOHJA – Sipas Lenjanit, Sala është një futbollist që e njohin thuajse të gjithë te skuadra e Sionit. “Edhe trajneri ka punuar me të. Ne e njohim të gjithë. Është e pabesueshme që të ndodhë diçka e tillë dhe të humbasë si të ishte një biçikletë. Ishte shumë i respektueshëm. I gjendem pranë familjes, duke menduar për të. Le të lutemi të gjithë, pasi kemi ende shpresë për shokun tonë Emiliano Sala”, është shprehur Lenjani.
