Lulzim Basha ka vendosur të drejtojë Partinë Demokratike në këtë mandat të tretë në opozitë me një ekip të ri.
Gjatë kësaj jave Basha ka takuar secilën prej figurave kryesore të PD-së për të diskutuar me ta pozicionet e reja, duke nisur nga Edi Paloka e Edmond Spaho që nuk do të jenë më nënkryetarë të Partisë Demokratike pas tetë vitesh në këto pozicione.
Burimet për median bëjnë me dije se nënkryetarët e rinj të PD-së do të jenë katër, Alfred Rushaj, i cili do të mbajë postin e kryetarit të grupit; Enkelejd Alibeaj që do të jetë edhe nënkryetar i Parlamentit; Jorida Tabaku, që do të ketë detyrën për të mbajtur marrëdhëniet me ndërkombëtarët dhe Grida Duma.
Këto të katër janë drejtuesit e nxjerr nga koshi i vjetër i Lulit që natyrisht do i “ndryshojnë” faqen PD duke e kthyer në fitues të humbjes së katërt të PD-së ashtu sikurse kanë fituar kudo që kanë kandiduar, në Tiranë, Durrës, Fier, të drejtuar nga “fituesi” i Elbasani Gazi Bardhi.
Numri dy i PD-së do të jetë sërish Gazment Bardhi. Ekipi i ri do të hidhet në votim pasditen e së hënës kur të mblidhet Këshilli Kombëtar.
Në këtë mbledhje do të kuptohet edhe qasja e Lulzim Bashës ndaj kritikëve brenda partisë, duke nisur nga Bujar Nishani, i cili ka mbajtur postin e kryetarit të Këshillit, te Fatbardh Kadilli, Arben Ristani, etj.. Por duke parë se Ristani u la jashtë Këshillit për shkak të qëndrimeve politike, duket qartë se të njëjtin fat do të pësojnë edhe kritikët e tjerë.