Shtetet e Bashkuara të Amerikës duken të vendosura për të goditur zyrtarët e korruptuar në të gjitha shtetet aleate përfshirë edhe Shqipërinë. I dërguari special i SHBA për Ballkanin Perëndimor, Gabriel Escobar paralajmëroi gjatë vizitës së tij në Tiranë se do të ketë shumë zyrtarë të tjerë që do të shpallen “non grata”, ndërkohë që ky plan pritet të vendoset në zbatim së shpejti.
Gazeta ka siguruar platformën e Shtëpisë së Bardhë për luftën kundër korrupsionit, e cila fokusohet në dy aspekte kryesore, zyrtarët e korruptuar dhe shpalljet “non grata”. Në platformën për luftën kundër korrupsionit renditen një sërë pikash nga seksioni 7031(c) i DASH për shpalljen “non grata”, të cilat kanë vendosur standarde lidhur me kufizimin e vizës dhe sanksionimin e pasurive që kanë ardhur nga korrupsioni.
Këto mekanizma e kanë ekspozuar korrupsionin ndaj zyrtarëve të lartë teksa është dhënë shembulli i sanksioneve në Bullgari, ku u shpallën “non grata” pesë zyrtarë dhe ish-zyrtarë të lartë për shkak të përfshirjes së tyre të konsiderueshme në korrupsion.
Sipas platformës, Shtetet e Bashkuara do të vendosin para përgjegjësisë të gjithë ata që përfshihen në korrupsion duke imponuar pasoja konkrete në një kohë që Amerika po punon për të mbrojtur sistemet financiare nga abuzime të këtij lloji. “Seksioni 7031(c) i DASH, Operacionet e Jashtme dhe Programet e Përafërta kanë vendosur standarde ndërkombëtare për kufizimet e vizave dhe sanksionet ekonomike të fokusuara veçanërisht në korrupsion.
Këto mekanizma kanë ekspozuar korrupsionin dhe kanë bllokuar zyrtarët e korruptuar në të gjitha nivelet e qeverisjes. Më 2 qershor 2021, SHBA-të ekzekutuan aksionin më të madh anti-korrupsion deri më sot, i cili ishte sanksionimi i 3 personave bullgarë për rolet e tyre të gjera në korrupsion, si dhe rrjetet e tyre që përfshijnë 64 subjekte, në Bullgari.
Sanksionet e Thesarit u plotësuan nga shteti për të caktuar publikisht edhe dy individë dhe tre bullgarë të tjerë zyrtarë publikë, sipas nenit 7031(c) për shkak të përfshirjes së tyre në korrupsion. Ky veprim tregon angazhimin e SHBA për të ngarkuar me përgjegjësi ata që janë të përfshirë në korrupsion dhe për të imponuar pasoja konkrete dhe domethënëse për ta në një kohë që SHBA punon për mbrojtjen e sistemit financiar nga abuzime të tilla”, thuhet në platformë.
Ja sesi do të bllokohen pasuritë
Shtetet e Bashkuara do të vijojnë luftën ndaj korrupsionit duke krijuar edhe nisma të reja. Në platformën kundër korrupsionit thuhet se Departamenti i Thesarit ka krijuar një ekip, i cili do të zhvillojë dhe mbështesë më tej nismat aktuale kundër korrupsionit si dhe do të trajtojë ndikimin e tij.
Sipas dokumentit, ky ekip do të punojë më të gjithë elementët e Departamentit të Thesarit duke përfshirë krimet financiare, sanksionet ekonomike, transparenca financiare dhe financat ndërkombëtare. “Departamentet dhe agjencitë do të mbështesin ekipet ndërsektoriale të krijuara për të luftuar korrupsionin dhe do të fillojë nisma të reja. Departamenti i Thesarit ka krijuar një ekip kundër korrupsionit për të zhvilluar dhe mbështetur zbatimin e nismave aktuale dhe të reja për të trajtuar korrupsionin dhe ndikim e tij.
Ky ekip punon me të gjithë elementët e Departamentit të Thesarit, përfshirë krimet financiare dhe inteligjencën financiare, sanksionet ekonomike, politika e transparencës financiare, hetimet penale tatimore, politika tatimore dhe financat ndërkombëtare”, thuhet në platformë./SOT