“Vesi duket se del me shpirtin”. Kjo thënie e popullit vlen për ish-kryeministrin Sali Berisha, i cili ka provokuar sërish në Ditën e Çlirimit.
Ashtu si çdo vit, edhe këtë 29 nëntor, ai ka publikuar një status në rrjetet sociale, ku sulmon luftën Partizane. Berisha shkruan se të gjitha provat tregojnë që Çlirimi ka ndodhur me 28 Nëntor, por që Enver Hoxha e ka falsifikuar me urdhër të Beogradit. Ai vazhdon të ulë vlerat e LANÇ dhe ta cilësojë luftën partizane një luftë vëllavrasëse dhe jo çlirimtare.
Ish-kryeministri Sali Berisha, shpreh se kjo sipas tij, është faktuar edhe me fakte, ndërsa theksoi se Partia Komuniste zbatoi gjatë luftës sipas tij një vijë politike terroriste.
“Historianët dhe studiuesit kanë faktuar me dokumente të pakundërshtueshme se udhëheqësit jugosllavë dhe vegla e tyre Enver Hoxha pas shtatorit 1943 luftën e shqiptareve kundër pushtuesve e degraduan në një luftë kryesisht vëllavrasje civile dhe se PKSH siç pranon unanimisht vet Enver Hoxha dhe udhëheqja tjetër e kësaj partie në plenumin e dytë të Beratit zbatoi gjatë luftës një vijë politike terroriste, pra veproi si një organizate terroriste.
Studimet e dekadave të fundit të bazuara në dokumente të panumërta kanë provuar se serbët, Enver Hoxha dhe vasalët e tyre të tjerë shqiptarë në krye të ushtrisë partizane të Shqipërisë kryen gjatë luftës kundër pushtuesve, gjenocid dhe krime të rënda ndaj shqiptarëve”, shprehet Berisha.