Të putheshe në film përpara viteve ’90 do të thoshte burg, internim apo degdisje në një provincë të largët. Por këto cungime në një film artistik natyrisht që ia humbisnin paksa shkëlqimin edhe filmit më të bukur. Aktori Ndriçim Xhepa ka rrëfyer në një intervistë për Panoramën rreth mungesës së erotikës në kinematografinë komuniste dhe puthjet që ngelën në tentativë.
“Puthja është një gjë normale dhe kështu duhet të jetë. Kemi një profesion të tillë dhe duhet të trëajtojmë me profesionalizëm çdo skenë. Nuk ndodhte kështu fatkeqësisht në kohën e Shqipërisë komuniste. Kujtoj që në filmin ‘Duaje emrin tënd” të dy regjizorët e filmit donin që të kishte një puthje midis personazhit që luaja unë dhe Jonës, por që fatkeqësisht nuk u bë. Edhe po të putheshim nuk do të kishte shumë dobi. Filmi kontrollohej dhe kalonte në disa duar para se të shfaqej, ndaj ishte e sigurt që do të censurohej”, ka thën Xhepa.
Ai shton se edhe nëse regjimi do t’a lejonte puthjen, nuk do të ishte e njëjta gjë për aktoret femra pasi paragjykimi i shoqërisë në atë kohë ishte shumë i lartë.
Xhepa ka përmendur një sërë filmash ku ka pasur si bashkëprotagoniste aktore bukuroshe si Matilda Makoçi, Rajmonda Bulku, Eva Alikaj apo Nertila Koka, duke thënë se kulmimi i këtyre filmave do të ishte shkëmbimi i një puthjeje midis protagonistëve, që nuk erdhi kurrë.