Ish-ambasadori i OSBE-së, William Walker, ka shprehur kritika të ashpra ndaj procesit gjyqësor që po zhvillohet ndaj ish-udhëheqësve të Ushtrisë Çlirimtare të Kosovës (UÇK) në Dhomat e Specializuara të Hagës.
Në një intervistë për Ekonomia Online, Walker e cilësoi trajtimin e të akuzuarve si një padrejtësi dhe një turp për drejtësinë ndërkombëtare, duke kritikuar kohëzgjatjen e procesit dhe kufizimet e shumta të vendosura mbi të akuzuarit.
“Gjithmonë kam qenë një admirues i madh i gjykatës në Hagë. Kam shkuar atje për të dëshmuar kundër Millosheviçit. Por procesi që u është imponuar Hashim Thaçit, Jakup Krasniqit dhe Kadri Veselit nuk është drejtësi. Të mbash të akuzuarit në paraburgim për tre vjet dhe t’u japësh shumë pak qasje në botë, për mua është një krim”, tha Walker.
Ai theksoi se gjykata po shkel parimin themelor të drejtësisë, sipas të cilit të akuzuarit janë të pafajshëm deri në dëshmimin e fajësisë.
“Vërtet ndjej se Gjykata Ndërkombëtare e Drejtësisë në Hagë nuk po demonstron drejtësi. Po demonstron të kundërtën. Nuk e fut dikë në burg për tre vjet ndërkohë që po zhvillon një gjyq me 400 dëshmitarë”, shtoi ai.
Walker gjithashtu shprehu shqetësim për qasjen kufizuese të Gjykatës Speciale, përfshirë pengesat për të vizituar ish-presidentin Hashim Thaçi dhe ish-kryetarin e Kuvendit, Kadri Veseli.
“Të mendosh se duhet të mbash në paraburgim një ish-president apo një ish-kryetar Kuvendi sepse mund të arratisen apo të intimidojnë dëshmitarët, është absurde. Thjesht mendoj se ajo që po ndodh në Hagë është një turp”, deklaroi ai.
Walker e përfundoi intervistën duke theksuar se qëndrimi i tij për procesin gjyqësor është “shumë negativ” dhe se mënyra se si po trajtohen të akuzuarit nuk reflekton standardet e drejtësisë ndërkombëtare.