Vrasja e një kineasteje në sheshxhirimin e një filmi hollivudian bëri bujë të madhe tetorin e 2021. Së fundmi Alec Baldwin ia ka dorëzuar telefonin e tij celular zyrtarëve të zbatimit të ligjit, si pjesë e hetimit të tyre për vrasjen fatale të kineastes, Halyna Hutchins në xhirimet e filmit “Rust”, tha zyra e Prokurorit të Qarkut në Santa Fe.
Kinematografja Halyna Hutchins u qëllua teksa Baldwin, 63 vjeç, po provonte një armë mbështetëse në xhirimet e filmit “Rust” në tetor të vitit të kaluar.
Zyra e Sherifit të Santa Fe konfirmoi se aktori ua kishte dorëzuar pajisjen autoriteteve pranë shtëpisë së tij në New York.
Ndërkohë në fillim të kësaj jave policia tha se aktori nuk po bashkëpunonte me hetimin, shkruan BBC. Zëdhënësi i Sherifit të Qarkut Santa Fe, Juan Rios i tha Los Angeles Times të premten se policia synon të mbledhë të dhëna si mesazhe me tekst dhe posta zanore nga celulari si pjesë e hetimit të tyre për incidentin.
Aaron Dyer, avokati i Baldwin, tha se klienti i tij e kishte kthyer vullnetarisht telefonin. “Por kjo çështje nuk ka të bëjë me telefonin e tij dhe nuk ka përgjigje në telefonin e tij. Alec nuk ka bërë asgjë të keqe”, deklaroi ai.
Ndërsa një padi kundër Baldwin pretendon se një skenari i filmit nuk kërkonte që ai të qëllonte me armë kur qëlloi për vdekje Hutchins.
Avokatët që trajtonin veprimin ligjor e përshkruan sjelljen e Baldwin dhe producentëve të filmit si “të pamatur” dhe i akuzuan ata se nuk respektuan protokollet e sigurisë.