SHBA- Nuk mundi dot. Aktorja e famshme Anne Heche ka vdekur ditën e sotme pasi iu hoq aparati që e mbante në jetë, një javë pasi përplasi makinën e saj në një shtëpi në Los Anxhelos.
Aktorja 53-vjeçare ishte shtruar në një spital në veri të Los Anxhelosit pas një aksidenti të tmerrshëm më 5 gusht. Ditën e djeshme një përfaqësues i familjes së saj konfirmoi se aktores i kishte vdekur truri dhe po mbahej në jetë vetëm me aparatura, në mënyrë që mjekët të mund t’i merrnin organet e saj për dhurim.
Policia duke hetuar shkaqet e aksidentit zbuloi se aktorja në momentin që u përplas me shtëpinë ka qenë nën efektin e kokainës.
Heche fitoi famë në vitet 1990 me role të ndryshme në Hollywood ku luajti në disa filma të njohur si “Donnie Brasco”, “Wag the Dog” dhe “Six Days Seven Nights”. Ajo vazhdoi të kishte role televizive, duke përfshirë serialin “Men in Trees” në 2006 dhe “Hung” në 2009. Aktorja interpretoi gjithashtu në Broadway, duke luajtur në “Proof” në 2002 dhe “Twentieth Century” në 2004.
Heche nisi një romancë me Ellen DeGeneres në vitin 1997 por gjithçka përfundoi në vitin 2000. Pas ndarjes Heche tha se ajo ishte në listën e zezë të Hollivudit dhe marrëdhënia e saj me nënën e saj ishte e tensionuar sepse ajo mendonte se romanca e të njëjtit seks të vajzës së saj ishte ‘mëkat’.