Izet Abazaj është 19 vjeçari i arrestuar gjatë ditës së sotme pas një grabitje të kryer në një lavazho natën e 31 dhjetorit në Sarandë.
Pikërisht ky person dyshohet të jetë “molla e sherrit” mes grupit të policëve Sulejmanaj dhe vëllezërve Nexhipi të konfliktuar në datën 1 janar në fshatin Gjashtë të Sarandës me armë e sende të forta.
I shpallur në kërkim për grabitjen në lavazho ku mori 400 euro, Abazaj ishte duke darkuar në lagjen nr.4 të Sarandës mes grupit të policëve Sulejmani.
Sipas asaj që raporton “BalkanWeb” Izet Abazaj dyshohet t’i ketë marrë një makinë me qira vëllezërve Nexhipi (Enea dhe Albi) dhe nuk e ka kthyer më.
Dyshohet se konflikti ka nisur në një lokal në Sarandë ku vëllezërit Nexhipi janë konfliktuar në ambientet e jashte me 19 vjeçarin dhe aty ka ndërhyrë oficeri i policisë Alvaro Sulejmani në mbrojtje të 19 vjeçarit.
Në ato momente në zonë ka mbërritur policia dhe pasi kanë konstatuar 19 vjeçarin e shpallur në kërkim, e kanë shoqëruar për në komisariat.
Pas kësaj, sherri dyshohet të jetë zhvendosur në fshatin Gjashtë ku personat kanë shkuar për tu sqaruar me njëri-tjetrin. Të përfshirë në këtë sherr janë 12 persona, mes tyre 4 efektivë të policisë, Alvaro Sulejmani, Inklid Sulejmani, Mihal Sulejmani dhe Ergis Sulejmani.
Konfliki i ndodhur në orët e para të 1 janarit, ka degraduar deri në përdorimin e sendeve të forta dhe armëve të zjarrit ku të plagosur nga ky sherr kanë mbetur Enea dhe Albi Nexhipi.
Në pranga të policisë kanë rënë 8 perosna, mes tyre 4 efektivët e policisë, 2 të tjerë janë shpallur në kërkim Igli Duka dhe Beqir Çoçka, ndërsa janë lënë të lirë Enea dhe Albi Nexhipi.