Juristi dhe aktivistit i njohur, Romeo Kara është shprehur se ka marrë kërcënime me jetë, pasi ka denoncuar afera korruptive qindra milionëshe për pushtetarët e lartë të korruptuar në Shqipëri, ku një ndër ta është dhe Ilir Meta, i cili ka përfunduar në SPAK.
Juristi Kara tha se e rrezikuar ndihet dhe familja e tij. Ai shprehet i bindur se jovetëm që ka ardhur koha, por ka kaluar që pushtetarët dhe politikanët e përfshirë në afera korruptive dhe kriminale gjatë këtyre 30 e kusur vitesh demokracie të dalin përpara drejtësisë dhe japin llogari për zullumet që kanë bërë. Gjatë një interviste për gazetën “SOT”, juristi Kara theksoi se drejtësia në vend duhet të vihet në lëvizje për të marrë në nën hetim ish-kryeministrin Sali Berisha dhe ish-presidentin Ilir Meta, për të cilin theksoi se ka depozituar në SPAK disa padi kundrejt tyre si të përfshirë në korrupsion galopant.
Ndërkohë zoti Kara shkoi edhe më tej teksa deklaroi se është kërcënuar dhe madje ndihet i kërcënuar, për shkak të denoncimeve të tij të bujshme për “mamuthët” e korrupsionit. Sipas tij, Berisha dhe Meta duhet të arrestohen dhe pasuria e tij duhet të konfiskohet. Gjithashtu avokati ka folur dhe për pastrimin e parave që pushtetarët e lartë të korruptuar i kanë bërë jashtë vendit.
Për rastin e pastrimit të parave nga Ilir Meta në Kongo, Romeo është shprehur: Unë kam zbërthyer një rast korrupsioni të tij në Kongo, së bashku me avokatët e Clifford Chance, por aty nuk pati investime, por, mashtrime sikur do të bëheshin investime. Pikërisht sepse nuk u bënë investimet e premtuara, Parlamenti i Kongos e revokoi koncesionin dhënë Ismailajt”, tha ai ndër të tjera.
-Zoti Kara, Bashkimi Evropian kërkon arrestimin e politikanëve të korruptuar si kusht për të hyrë në BE, a kanë ndërkombëtarët një listë me emra që SPAK duhet t’i arrestojë?
Padyshim që Bashkimi Europian do të kërkojë jo vetëm arrestimin e politikanëve të korruptuar, por edhe dënimin e tyre, sekuestrimin e pasurive të vëna nëpërmjet korrupsionit, si dhe instalimin e shtetit të së drejtës, gjë e cila në Shqipëri, nuk mund të realizohet, pa ndëshkimin e çdo faktori korruptues.
Patjetër që ata kanë lista, fakte dhe prova mbi të cilat mbështeten këto kërkesa të tyre. Korrupsioni në Shqipëri, si çdo korrupsion në botë, buron nga lart dhe me bekimin e plotë të politikës së lartë. Prej më shumë se 30-vitesh, pushteti në Shqipëri është marrë vetëm me qëllimin për t’u pasuruar sa më shumë dhe sa më shpejt nëpërmjet korrupsionit, duke instaluar për këtë qëllim, një teatër absurd politik, degjenerues i çdo vlere për shoqërinë dhe vendin.
Jemi në zgrip të shpërbërjes së plotë morale, prandaj lufta ndaj korrupsionit është padyshim një sfidë mbijetese për këtë popull dhe këtë vend. Duke qenë se është korruptuar çdo aspekt dhe nuk po kemi se nga t’ia nisim më parë kësaj sfide, mendoj se jemi me fat që faktori ndërkombëtar po tregohet gjithmonë e më i vendosur në drejtim të realizimit të ndëshkimit real të personave përgjegjës të kësaj dukurie.
Tashmë jemi kthyer në një problem ndërkombëtar, prandaj besoj se edhe ndihma kryesore për të luftuar korrupsionin do të vij prej këtij faktori. Të gjitha dihen, thjesht duhet të kalojmë në veprime reale, duke zbatuar sa më shpejt dhe sa më korrekt ligjin. Sigurisht duke bërë edhe ndryshimet e duhura ligjore. Kjo detyrë nuk mund të realizohet nga të përzgjedhurit e kësaj politike, por vetëm nga persona me devotshmërinë dhe integritetin e duhur të cilët e konsiderojnë vetëm si mision një përballje të tillë.
-Sipas jush, kush janë pushtetarët e lartë shqiptarë të korruptuar në këto 30 vite? Flet dot juristi Romeo Kara me emra…?
Shkurt, pastër dhe qartë: të gjithë pushtetarët prej vitit 1991 e në vazhdim. Të gjithë kanë realizuar deri më tani me sukses të plotë vetëm një gjë: garimin e paturp se, kush të gënjejë e të vjedhë sa më shumë nga prona publike, duke u kthyer ne pronarët realë të këtij vendi dhe pengmarrës të fateve tona. Nuk ka konotacion më të urryer emri politikan se sa ai i politikanit shqiptar.
Portreti i një politikani shqiptar, duke iu përmbajtur kodit të sjelljes mund ta përkufizosh padyshim: të korruptuar, të lig, keqbërës, të pabesë, mëkatar, zuzar, kriminel, zullumqar, i djallëzuar, mashtrues, i pacipë, hajdut, bandit, shpërdues dhe vrasës i besimit, i zi, dhunues, përvetësues, shkelës i ligjit, mafioz, abuzues, etj. Kam folur dhe dot flas pa u lodhur me emra konkretë derisa të konkretizohet një drejtësi e merituar për këtë soj antishqiptar që ka marrë peng Shqipërinë. Për të qenë i saktë dhe etik, emrat konkretë i përdor shoqëruar me fakte dhe prova në mbështetje të tyre. Tashmë dihen qëndrimet e përsëritura të mia publike lidhur për sa më sipër.
-SPAK ka rrëzuar padinë e avokat Idajet Beqirit për ish-presidentin Ilir Meta dhe Sali Berisha për vjedhjen e Floririt të Krrabës me pretendimin se ka kaluar shumë kohë dhe grabitësit janë dënuar kohë më parë dhe ajo çështje është mbyllur. Mendoni se Meta dhe Berisha i kanë zhdukur të gjitha provat?
Tashmë SPAK-u është tërësisht inefiçent, i pabesueshëm dhe larg pritshmërisë për të cilin u krijua. Me këtë ritëm të punës së tij edhe veprat penale të korrupsionit, që janë konstatuar së fundi, do të parashkruhen, duke favorizuar pandëshkueshmërinë e politikës së korruptuar. Pa bërë hetime, prokurorja e famshme e SPAK-ut, që mbin gjithmonë si fanti spathi, sa herë që ka ndonjë kallëzim kundra Metës, kërkon pushimin e çështjes, për arsye të parashkrimit të veprës penale.
Prej pesë vitesh fle në SPAK kallëzimi im përkundrejt Metës, duke pritur të plotësohen afatet e parashkrimit të veprës penale. Nëse drejtësia nuk do të vihet nëpërmjet funksionimit të institucioneve, ajo patjetër do ta gjejë rrugën e saj në forma të tjera, qoftë edhe fshatshe. Ky popull nuk duhet ta lypë drejtësinë, por ta marrë vetë në dorë vendosjen e saj.
Nëse nuk i jep drejtësi vetes, askush nuk ta jep. Fuqia e kësaj politike për të mbajtur pandryshuar padrejtësinë mbi qafat tona, vjen vetëm nga fakti sepse ne jemi të nënshtruar dhe të bindur përpara saj. Mjafton të mos bindemi më dhe kjo padrejtësi do të bjerë njësoj si një mollë e kalbur. Jetojmë në kohën e madhështisë së absurdit. Pikërisht kjo politikë që na bën të besojmë absurditete, kjo politikë po na detyron t’i bëjmë edhe vetes padrejtësi.
Përse SPAK-u dhe politika kurrë nuk kërkojnë amendimin e Kodit Penal lidhur me afatin e parashkrimit të veprave penale të politikës, duke i zgjatur në maksimum ato për të mos thënë që duhen hequr fare. Si mund të merret parasysh parashtrimi i veprave penale kur ai që ka kryer veprën penale ka marrë peng tërësisht shtetin dhe sistemin e drejtësisë? Në këtë rast parashkrimi i tyre duhet patjetër që të pezullohet.
Duke parë pasojat e kësaj politike të korruptuar ne shohim qartë dhe pa asnjë ekuivok se, kemi të bëjmë me krime kundër njerëzimit dhe për këtë arsye ato nuk duhet të parashkruhen kurrë. Nuk ka parashkrim të veprës penale kur siguria juridike është zero. Ne nuk do të jetojmë në përjetësi zhytur në këtë llum të pashembullt moral. Kontrata sociale me politikën ka rënë dhe popullit i duhet të marrë në dorë fatet e tij pa pyetur dhe pa pritur më karikaturën SPAK.
-Ndërkohë, zoti Beqiri në një interviste të publikuar pak ditë më parë në gazetën “Sot”, zbuloi se Ilir Meta i ka fshehur paratë dhe floririn ne parajsa fiskale, veçanërisht ne Afrike. Madje përmendi edhe emrin e një ministri në Kongo që ka dijeni për pasuritë e Metës. Keni një koment dhe mund të na thoni diçka më shumë?
Unë kam zbërthyer një rast korrupsioni të tij në Kongo, së bashku me avokatët e Clifford Chance, por aty nuk pati investime, por, mashtrime sikur do të bëheshin investime. Pikërisht sepse nuk u bënë investimet e premtuara, Parlamenti i Kongos e revokoi koncesionin dhënë Ismailajt.
-A ndiheni të kërcënuar ju dhe a jeni të mbrojtur ende nga Garda?
Padyshim që jam i vetëdijshëm për çfarë kam bërë dhe po bëj. Mora guximin jo vetëm të investigoj korrupsionin e nivelit më të lartë në Shqipëri, por edhe të mbroj këtu dhe jashtë vendit interesat e Shqipërisë në shumën totale rreth 200 milionë euro, duke qenë aktiv dhe në përballje ne procese arbitrazhi jashtë, procese penale dhe civile këtu, komisione investigimi parlamentare, etj. Jo vetëm ndihem i kërcënuar, por, unë realisht jam kërcënuar edhe pse kurrë prokuroria nuk zbatoi ligjin për mbrojtjen time dhe të familjes sime. Ruhen me vendime te iniciuara prej prokurorisë, killera, gjykatës dhe prokurorë faqezinj, por, lidhur me mua tregoi vendosmërinë më të madhe, për të mos u ofruar mbrojtja që parashikon ligji.
Vetëm policia ka ofruar për disa kohë mbrojtje, gjë e cila u hoq brenda 24 orëve, pasi unë kërkova publikisht dorëheqjen e ministrit të brendshëm Lleshaj, lidhur me rastin e vrasjes së të riut Klodian Rasha në Laprakë. Kallëzimet lidhur me Berishën dhe Metën e vulosën përfundimisht këtë raport timin me prokurorinë, pasi ajo ka qenë realisht një avokate e interesave të tyre, pasi ka punuar dhe kërkuar përpara gjykatave vetëm pushimin e çështjeve, edhe pse akuzat e mija janë pothuaj të pakundërshtueshme. Sidoqoftë, unë kurrë nuk kam menduar të heq dorë nga kjo përballje edhe pse nuk kam mbrojtjen e duhur dhe dashakeqësinë e prokurorisë, gjykatave dhe mjaft politikanëve të rangut të lartë.
Disa prej tyre, që sot i bien gjoksit duke përvetësuar punën time, më kanë kërkuar të tërhiqem nga ajo çfarë po bëj dhe më pas kanë bërë veprimet konkrete kundra meje, për t’i thënë Berishës dhe Metës se, Romeo po vepron në kokë të tij dhe pa përkrahjen tonë. Jo vetëm kaq, por kanë lypur ftesë për mëngjesin e lutjeve, 2018-9 në USA, vetëm me qëllimin që të shfrytëzonin rastin për të qenë pranë Metës atje. Pikërisht këto veprime tinzare dhe burracake, më kanë kujtuar postulatin e Dizraelit:”shume njerëz mendojnë se:” politika luhet nga lloj-lloj njerëzish.
Kështu mendojnë ata që nuk dinë të luajnë në prapaskenë”. Mendoj se, e njoh mjaft mirë tashmë skenën dhe prapaskenën e politikës shqiptare, rreziqet dhe sfidat që ofron përballja me kumbarët e saj, tashmë të shkrirë përfundimisht krimin dhe llumin më ordiner. Në të ardhmen, parashikoj t’i shkruaj kujtimet e mia, ku një vend të veçantë, do t’i kushtoj hipokritëve, të cilët peshonin paratë e ryshfetit, ndërsa unë rrezikoja veten dhe familjen, në përballje me të korruptuarit. Përsa kohë e vazhdoj këtë punë për riza të Zotit, sfidat i pres me kënaqësi, ngado dhe sido që të vijnë.
-Gjithashtu Kuvendi ka hapur rrugën edhe për pastrimin nga politika për spiunët, mendoni se Ilir Meta dhe Sali Berisha këtë herë nuk mund të shpëtojnë nga përjashtimi nga politika?
Spiunllëku është mëkati më i vogël i tyre. Ata duhet të largohen nga politika së pari për mashtrimet elektorale, vrasjet, vjedhjet, rrënimin e vendit dhe talljen që kanë bërë me këtë popull. Atyre dhe të gjithëve të ngjashmëve me ta, duhet t’u konfiskohet edhe qindarka e fundit. Ata duhet të ndëshkohen së pari për korrupsion, duke dhënë shembullin për të tjerët pas tyre.
Largimi i tyre vetëm si spiunë, nuk i dëmton ata ashtu siç e meritojnë. Kanë një detashment të tërë bashibozukësh politikë që do të paguhen për të mbrojtur interesat e tyre. Burgimi dhe konfiskimi total i pasurisë është zgjidhja e duhur. Nuk iu ka mbetur më cipë atyre, për t’u prekur shumë nga statusi i spiunit. Atyre iu dhimbset vetëm lëkura e tyre dhe pasuria ku kanë edhe shpirtin.
-Sali Berisha ka shtuar sulmet ndaj ndërkombëtarëve, veçanërisht ndaj britanikëve dhe amerikaneve, pasi ka akuzuar zv/sekretarin Escobar dhe ambasadorin e Britanisë së Madhe në vendin tonë si të korruptuar. Madje për këtë te fundit ka paralajmëruar se do hap gjyq kundër Londrës, sepse siç thotë ai e kanë shpallur “non grata” pa prova. Si ju duket ky kurs i Berishës?
Ky është kursi i një të pashpresi, i cili sigurisht që do të bëhet tërësisht qesharak, Don Kishot dhe Nastradini në muajt në vazhdim. I zhytur në llum sa s’ka ku të shkojë më, Berisha ka edhe fytyrë të flasë për dinjitet, mbrojtje dinjiteti, padi dinjiteti dhe qiqra në hell. Dy dosje me prova, ia kam çuar vetëm unë që në vitin 2017, prokurorisë shqiptare. Çfarë do tjetër Saliu?
As boja e poligrafikut nuk del për t’i shkruar bëmat e Berishës, ndërkohë që hipur mbi mullarin e mëkateve të tij, si gjeli majë plehrave, kakaris përpara bashibozukëve të tij për nder e dinjitet. Le t’i hapë gjyqet edhe ne Hënë po të dojë se edhe aty do t’ia çojmë provat. Fati i Berishës është i vulosur tashmë me vulën më të zezë të turpit dhe nuk ka asnje padi apo marifet që e zhbën atë.
-Keni një koment mbi lëvizjet e PD për t’u bashkuar?
Në u bashkofshin me Berishën, paçin fatin e tij. Deri më tani kanë qenë thjesht një bandë politike, larg një organizimi demokratik, ashtu siç e parashikon kushtetuta dhe ligji për partitë politike. Bashkimit me Berishën do t’i japë asaj partie ngjyra antiamerikane dhe antiperëndimore, duke forcuar izolimin e saj dhe zhbërjen e saj si faktor politik.
Presupozojmë se erdhën në pushtet. Çfarë do të bëjnë me të ndërkohë që të janë mbyllur të gjitha dyert? Thjesht do t’i japin edhe pak kohë Berishës për të vonuar fundin e tij. Kush ka akoma mend prej tyre duhet t’i analizojë dhe kuptojë mirë lëvizjet e Bashës. Megjithatë, duke parë konsumimin e pakthyeshëm të kësaj partie dhe të tjerave si ajo, shkrirja dhe largimi i saj nga jeta politike, do të ishte veprimi më parimor i saj. Ka pothuajse 10 vjet që ka marrë peng opozitën reale, pa bërë asgjë të hajrit. Vendit i duhen forca të reja politike dhe jo riciklimet pafund të së kaluarës.
-Sa të suksesshëm do jenë Meta dhe Berisha për të mbushur sheshet me protestues, me qëllim rrëzimin e qeverisë?
Sheshet mund t’i mbushi keqqeverisja, por, absolutisht jo një dyshe rrufjanësh të kalibrit Meta-Berisha. Askush nuk i beson më broçkullat e dala nga goja e kësaj dysheje tinëzare të plakur, thinjur, shtrembëruar e rrudhur duke vjedhur majë karriges së pushtetit. Se çfarë mund t’i duhet më Shqipërisë, komunisti me nr.108690 dhe burri i Monikës, këtë gjë vetëm qorrat dhe horrat mund ta pranojnë. Nëse kanë lënë gjë pa bërë, atëherë bujrum, le të kthehen prapë në pushtet.
-Si ju duket koalicioni Meta-Berisha?
Po ta trajtoja në terma matematikorë do të thoja: llum në fuqi llum apo llum në katror. Aleancë të pastër llumi dhe hajdutësh, për të ruajtur privilegjet dhe menderen e tyre. Asgjë tjetër nuk nënkupton bashkimi i tyre. Kur iu ka leverdisur, nuk kanë lënë gjë pa i thënë njëri-tjetrit, ashtu siç po bashkohen tani, pikërisht sepse iu leverdis atyre. Kur bashkohen djajtë duhet rritur vigjilenca.