Lionel Messi fitoi për herë të 7-të në karrierë Topin e Artë, trofeun individual më të lakmuar në botën e futbollit.
Për futbollistët shqiptarë përfshirja në 30 më të mirët e këtij sporti mbetet ende një tabu, megjithëse atë e ka arritur një prej legjendave të futbollit tonë. Bëhet fjalë për Sokol Kushtën, ish-lojtarin e Flamurtarit, Partizanit dhe Kombëtares Shqiptare.
Në vitin 1987, Kushta ishte në mes 30 më të mirëve të botës krah emrave të mëdhenj si Marco Van Basten, Emilio Butragueño dhe Ruud Gullit, me këtë të fundit që u shpall edhe fitues i çmimit, teksa në atë kohë luante me italianët e Milan.
Sokol Kushta arriti të merrte vetëm 1 pikë, po aq sa edhe Alessandro Altobelli i Inter apo legjenda gjermane Rudi Voller, që në atë vit luante për Romën, por futja e tij mes 30 më të mirëve është një arritje e madhe për vetë Kushtën dhe futbollin shqiptar të asaj kohe.