Pas dy publikimeve të mëparshme rreth denoncimit të aferës “Deco 2000” ku nën hetim janë motra dhe mbesa e Albana Vokshit, Mimoza Vokshi dhe Ajlin Sharku, së fundmi është vënë në lëvizje edhe organet përkatëse tatimore, duke regjistruar denoncimin dhe duke kaluar në lupën e hetimit kompaninë “Deco 2000” mbi dyshimin e Evazionit Fiskal.
Rikujtojmë se mbi to ka nisur një hetim i thelluar mbi veprimtarinë e “Deco 2000” sh.p.k nën dyshimin e kryerjes se pastrimit të parave dhe së fundmi dhe atë të falsifikimit të dokumentave. Nga burime pranë hetimit bëhet e ditur se aktualisht po priten të vijnë kthim-përgjigjet nga të gjithë bankat e nivelit të dyte për çdo transaksion bankar dhe gjendjet e llogarive bankare që disponojnë Mimoza Vokshi, Ajlin Sharku por dhe rrethi i ngushtë familjar i tyre, duke kaluar kështu nën lupë pasurinë e tyre apo çdo lëvizjeje të dyshimtë të bërë nëpërmjet transaksioneve bankare.
Por risia qëndron se, së fundmi nga burime pranë redaksisë është siguruar një e-mail nga strukturat tatimore që pohojnë se tashmë janë vënë në lëvizje edhe strukturat përkatëse të tyre për të verifikuar dhe një shkelje të re penale që mund të jetë kryer, atë të evazionit fiskal nëpërmjet kompanisë “Deco 2000” të Mimoza Vokshit dhe administratores së dorëhequr tashmë ditën e parë që ky denoncim u bë në media, Ajlin Sharkut. Përfshirja e strukturave përkatëse tatimore do të bej të mundur sqarimin e disa momenteve kyçe rreth aktivitetit të kompanisë “Deco 2000”, si:
1- Si u arrit të shpërndahej një divident 627 milionë lekë nga fitimet e vitit 2024?
2- Sa është xhiroja që ka arritur “Deco 2000” për vitin 2024, kur vetëm fitimi i këtij viti nga aq sa është shpërndarë rezulton të paktën në një vlerë prej 627 milionë lekë?
3- Çfarë ka ndodhur që vitin e kaluar “Deco 2000” depozitonte pranë Tatimeve një deklarate të tatimit të thjeshtuar, që i korrespondon një biznesi të vogel me xhiro jo më shumë se 80 milionë lekë, ndërsa për këtë vit kur fitimi është 627 milionë lekë, xhiro e Deco 2000 i bie të jetë rreth 1.8 miliardë lëkë?
4- Nga viti 2023 me xhiro në vlerë më të vogël se 80 milionë lekë, në vitin 2024 me xhiro që përllogaritet në vlerën 1.8 miliardë lekë. Si është rritur me 24-fish xhiroja brenda një viti?
5- Si u arrit që vetëm me një punonjës (Ajlin Sharku – administratore) të realizohet ky fitim këtë vit?
6- Përse për asnjë vit nuk janë dorëzuar pranë QKB bilancet e shoqërisë Deco 2000 si një detyrim ligjor?
7- Objekti i veprimtarisë të “Deco 2000” është dhe “Qendër Estetike”. Si funksionon kjo qendër estetike, kur si punonjëse pranë Tatimeve deklarohet vetëm Ajlin Sharkun si administratore. Prezumuar të vërtetë ekzistencën e ushtrimit të “Qendrës Estetike”, i bie që punonjësit e qendrës estetike të punojnë dhe paguhen në të zezë?
8- Tek vendimet të shpërndarjes së dividentëve citohet një adresë e vendosur nga Mimoza Vokshi. Nga verifikimi i kësaj adrese, faktikisht ajo adresë i përket një kompanie tjetër krejtësisht pa asnjë lidhje me Deco 2000. Përse është vendosur një adresë fiktive tek vendimi i shpërndarjes së dividentëve?
9- Ndërsa Ajlin Sharku kishte marr mandatin si administratore vetëm para 8 muajsh dhe kishte një mandat 5 vjeçar deri më 5 Mars 2029, përse Ajlin Sharku dha dorëheqjen ditën e publikimit në media më 18 Nëntor 2024? Mos ka të bëj me faktin që koha gjatë së cilës Ajlin Sharku ishte administratore u shpërnda dhe dividenti prej 627 milionë lekësh?