Ish-lojtari i famshëm i Dinamos dhe Kombëtares shqiptare, Sulejman Demollari, është vlerësuar sot me titullin Mjeshtër i madh”. Ia ka akorduar këtë titull Presidenti Ilir Meta. “Në vlerësim të talentit, profesionalizmit dhe rezultateve të larta, si futbollist me një karrierë shumë të suksesshme në arenën kombëtare dhe ndërkombëtare, duke shpalosur vlerat e një sportisti model, shembull frymëzimi për të gjithë futbollistët e rinj”. Ky është motivacioni i dhënies së këtij titulli për legjendën dinamovite.
Presidenti Meta, gjatë ceremonisë së akordimit të këtij titulli, ka vlerësuar figurën e Sulejman Demollarit, të cilin e konsideron një shembull për të gjithë të rinjtë. “Titullin ‘Mjeshtër i madh’ Demollari e ka marrë në fushë, ia kanë “dhënë” tifozët shqiptarë prej vitesh. Demollari, model i shkëlqyer i sportistit shembullor dhe i “fair play”. Lojtar model i Dinamos, më i spikaturi i këtij ekipi. Figura e Demollarit është nxitje për brezat e rinj për t’u marrë me sport e për të qenë të suksesshëm në jetë”, – ka thënë mes të tjerash Presidenti Meta.
Vetë Sulejman Demollari falënderoi Presidentin për këtë vlerësim: “Presidenti përherë ka vlerësuar sportistët. Titulli “Mjeshtër i madh”, që ai më akordoi, i përket futbollit shqiptar dhe tifozëve kuqezi”. Kujtojmë se ky është një cmim dhe vlerësim i vonuar për një prej futbollistëve më të mirë që ka prodhuar ndonjëherë Shqipëria, një ikonë e Dinamos dhe Kombëtares dhe ndoshta futbollisti më cilësor që kemi pasur ndonjëherë.