Avokat i njohur Spartak Ngjela u shpreh se protesta e thirrur nga ish-kryeministri Sali Berisha të shtunën ishte për t’i dhënë mesazh amerikanëve se ka forcë pasi i druhet ekstradimit se është i shpallur “non grata” dhe përballet me akuza të rënda.
Në një intervistë, ai ka shtuar se numri i protestuesve nuk ishte aq i lartë pasi nuk arrinin as te Ura e Lanës. Gjithashtu Ngjela shtoi se Berisha është i dështuar, por Edi Rama e do. Sipas Ngjelës, kryeministri flet kundër tij vetëm se detyrohet nga ndërkombëtarët. “Ju mendoni se mund të vijë në pushtet në një vend ku 97% të shqiptarëve janë pro amerikanë? Me 33 mijë vota do vijë? Është i dështuar.
Nuk e ka hallin te votat. Ai kërkon t’i thotë amerikanëve që ka forcë e të mos shkojë më tutje se i druhet ekstradimit. Të shohim si do të vijojë. Edi Rama vjen me vota të shqiptarëve, jo të amerikanëve. Edi Rama e do Saliun, ju e keni parë. Edhe herën e fundit që foli kundër Saliut, e detyrua ndërkombëtarët se nuk donte. Ekzistenca e Saliut i jep votat atij, e shkatërroi PD, e ndau në 2 pjesë.
Po të kishte ikur që në 2013 do ishte ndryshe historia e Shqipërisë sot në funksion të së djathtës. Ndërkohë protestuesit nuk arrinin as te Ura e Lanës. Kalova aty”, u shpreh Ngjela i ftuar në një studio televizive. Po ashtu, Ngjela komentoi fjalimin e Berishës para protestuesve duke thënë se nuk do të arrijë askund me fjalë fyese dhe e krahasoi me Enver Hoxhën.
“Këta kujtojnë se fitojnë me fjalë fyese? Nuk bën burri i shtetit fjalime të atilla. Edhe Rama në të njëjtën mënyrë. Çfarë nuk tha. Komplet si Enver Hoxha. Kundërshtarët e tij ose do ishin hajdutë ose vrasës”, u shpreh Ngjela. Nuk ndodh askund që opozita politike të trembin qeverinë, e cila i ka të gjitha votat e mjaftueshme në Parlament për të vazhduar deri në fund legjislaturën, kjo është një përpjekje jo për të rrëzuar qeverinë, por për t’i mbush mendjen militantëve të vet që ne jemi të zotë dhe se do fitojmë radhën tjetër.
I gjithë ky skenar është përsëritur edhe para 4 vitesh edhe para 8 vitesh, protesta janë bërë gjithmonë, kanë qenë edhe protesta të ashpra, të dhunshme dhe asnjë gjë nuk ka dalë.