Mëngjesin e sotëm, në fshatin Vërzhezhë të Skraparit është aksidentuar një furgon. Nga aksidenti kanë mbetur të plagosur katër fëmijë. Sipas raportimeve të para është bërë e ditur se në furgonin i cili transportonte nxënësit e një shkolle 9-vjeçare ndodheshin tetë fëmijë.
Furgoni ka humbur kontrollin dhe si pasojë është përmbysur. Ngjarja ka ndodhur rreth orës 08:00 të mëngjesit dhe menjëherë katër prej nxënësve të plagosur janë transportuar për në spital ku edhe kanë marrë ndihmën e parë mjekësore në spitalin e Beratit.
Sipas mjekëve, dy prej nxënësve të plagosur janë në gjendje të rëndë shëndetësore dhe pritet të nisen me helikopter drejt Tiranës pasi kanë nevojë për një shërbim më të specializuar mjekësor.
Gjithashtu bluzat e bardha kanë bërë me dije se dy prej nxënëve të plagosur janë jashtë rrezikut për jetën dhe do vijojnë të ndiqen në spitalin e Beratit. Ndërsa katër nxënësit e tjerë së bashku me shoferin e furgonit kanë marrë vetëm disa plagë të lehta.
Menjëherë pas aksidentit në vendin e ngjarjes kanë mbërritur edhe forcat policore ku edhe ka nisur një hetim më i detajuar për zbardhjen e ngjarjes. Sipas policisë është bërë e ditur se sipas të dhënëve të para, shkak i aksidentit ka qenë terreni i vështirë ku po udhëtonte automjeti gjë e cila ka bërë që shoferi i furgonit të humbte edhe kontrrollin. balkanweb
