Shqipëria gjithnjë ka qënë vendi i çudirave, ndërsa legjislativi e pushteti vendor janë “sektorët” ku është “implementuar” me sukses ngritja e maskarallëkut në institucion.
Mjafton të bësh një “dorë” lekësh në Itali apo vende të tjera të BE, pa hyrë thellë se me çfarë aktiviteti janë fituar, dhe mund të arrish çfarë të duash në Shqipëri.
Ndërkohë që investimi më “rentabël” i këtyre parave ka qënë dhe është në politikë.
Pavarësisht se mund të kesh qënë kriminel, trafikant droge e prostitutash apo hajdut shtëpish, me një dorë lekësh arrije të bëje “pastrimin” dhe gdhiheshe deputet apo kryetar bashkie.
Janë të shumta rastet që kanë ndodhur dhe po ndodhin në Shqipëri, pjesa më e madhe e të cilëve kanë ngecur në “rrjetën” e ligjit të dekriminalizimit, dhe rast pas rasti po largohen.
Por “dekriminalizimi” nuk ka bërë punë për Agron Kapllanajn, i cili vijon të jetë kryetar i bashkisë së Mallkastrës, si përfaqësues i PD në opozitë.
Ndonëse ka një dënim me 2 vjet burg në Itali, kjo nuk e ka penguar Kapllanajn të kandidojë në Mallkastër, të investojë lekët në “biznesin” e duhur dhe të fitojë me siglën e PD.
Për Kapllanajn u kërkua nga PS që të dorëzojë mandatin e kryetarit të bashkisë, por prokuroria e Adriatik Llallës dhe KQZ nuk dëgjuan nga ai “vesh” dhe çështja shkoi deri në Kushtetuese.
Kreu i PD Lulzim Basha e mbrojti me fanatizëm kryebashkiakun e tij, ndërkohë që akuzat për vjedhje u cilësuan si politike. Ka një vendim të gjykatës së Firences përmes të cilit është dënuar me 2 vite burg për vjedhje, kryebashkiaku Agron Kallanaj.
Në kundërshtim flagrant me ligjin, dhe Prokuroria, ndonëse në vendimin e saj e pranon se Agron Kapllanaj përfshihet në fushën e veprimit të nenit 2, gërma c) të ligjit 138/2015 për “Dekriminalizimin” … pasi … “me vendim të datës 07.04.2003, cili ka marrë formë të prerë në datë 17.02.2004, z.Agron Kapllanaj është dënuar me 2 vjet heqje lirie dhe 200 euro gjobë për kryerjen e veprës penale të “Vjedhjes”…”, vendosi të mbyllë të dy sytë për këtë kryebashkiak.
Organi i akuzës e lejon Kapllanajn të qëndrojë në detyrë, me arsyetimin se “ndalimi 10-vjeçar i parashikuar nga ligji për dekriminalizimin në lidhje me këtë masë dënimi ka përfunduar tashmë prej 1 viti”, (më 16.02.2016).
Ndërsa vepron kështu, Prokuroria bëri sikur harroi se, për shkak të natyrës e qëllimit të posaçëm të ligjit për “dekriminalizimin”, Kuvendi vendosi që t’i japë atij fuqi prapavepruese.
Ndaj edhe koha prej nga kur duhet të fillonte përllogaritja s’është dita kur Prokuroria përfundon verifikimin e saj, por koha kur subjekti që verifikohet ka marrë mandatin, pra në qershor 2015.
Si të mos mjaftonte “zemërmirësia” e paligjshme dhe standardi i dyfishtë, sepse ligji nuk i ka dhënë tagër Prokurorisë të bëjë intepretimin apo të falë ndonjë subjekt, kësaj i shtohet edhe shpërdorimi i detyrës nga ana e kryetarit të KQZ.
Kreu i institucionit më të lartë zgjedhor, ndonëse e ka patur në tavolinë këtë informacion që më 16.10.2017,vendosi të mos respektojë detyrimin ligjor për ta përcjellë atë në mbledhjen publike të institucionit brenda 10 ditëve, sikundër e detyron neni 10 i ligjit nr.138/2015 “për dekriminalizimin”.
Në këtë mënyrë Agron Kapllanaj është në detyrën e kryebashkiakut të Mallakastrës nën siglën e PD në shkelje të ligjit të dekriminalizimit, pasi është dënuar me vjedhje në Firence-Itali.
Nga dosja hetimore në Itali mësohet se Kapllanaj ka qënë bërë tmerri i Firencës, pasi gati çdo natë vidhte shtëpitë, duke përvetësuar çfarë gjenin, para, aksesorë, byzylykë e deri tapete dhe perde.
Ai kryesonte një bandë “skifterësh” të rrezikshme që kishin vite që merreshin me këtë profesion, ndërkohë që në gjuhën e hajdutëve ata quheshin profesionistët e “tubave”, pasi ngjiteshin dhe hynin nga dritaret e shtëpive përmes tubave në shkarkimit të ujrave.
Aq tmerr ishin bërë për banorët e “kryeqytetit të kulturës” në Itali, Firences, sa arrestimi dhe dënimi i tyre, për pasojë dhe kapos së bandës Agron Kapllanaj, u cilësua si çlirim dhe qyteti festoi për largimin e tyre nga skena.
Por “skifteri” Agron Kapllanaj me lekët e bërë nga vjedhja e shtëpive në Firence, arriti që të merrte mandatin e kryetarit të Bashkisë në Mallkastër.
Nuk është habi, që të rikandidojë sërish, ndoshta dhe pa dëshirën e PD, tashmë për të vijuar vjedhjen nga brenda institucionit, pa pasur nevojën të ngjitet përmes “tubave” dhe të hyjë nga dritarja./Pamfleti