Lajmi se Shqipëria dhe Kosova do të zhvillojnë një ndeshje miqësore në Zvicër, shkaktoi jo pak përplasje mes tifozerive në të dy vendet, për një ndeshje e cila nuk do të jetë aspak si ajo “vëllazërorja” e luajtur në vitin 2015.
Do të jetë një sfidë mes lojtarësh që njihen, shumë prej të cilëve kanë veshur ngjyrat kuqezi, por që tashmë do të dëshirojnë të tregojnë se edhe me ngjyrën blu kanë të ardhme. Por reagimet e tifozerive kishin bërë që dy Federatat të stepeshin pak dhe të mos e cilësonin përfundimtare organizimin e një ndeshje të tillë në maj.
Por për ta zyrtarizuar atë ka menduar FIFA-, e cila me sa duket ka marrë njoftimin nga pala kosovare se një përballje e tillë do të luhet para Botërorit 2018, siç përflitej prej kohësh. Në një speciale për Kosovën, ku tregon rrugëtimin dhe ambiciet e kësaj të fundit, në faqen e internetit të FIFA-s saktësohet se ndeshja mes Shqipërisë dhe Kosovës është planifikuar të luhet më 29 maj.
Shqipëria, e cila do të grumbullohet në Zvicër për rreth 10 ditë, për t’u vënë nën urdhrat e Panuçit, më pas do të zhvillojë edhe një takim tjetër miqësore të cilin e ka zyrtarizuar pak kohë më parë, atë ndaj Ukrainës.