Dr. Halil Krasniqi, i cili jeton dhe punon në Gjermani, ka shpikur një instrument për stentim të dyanshëm pa prerje i cili mundëson trajtimin e sëmundjeve të arterieve dhe venave të gjakut, pa prerje apo shpim të dyfishtë.
Dr. Krasniqi mban mbi supe mbi 15 mijë operacione dhe është ndër mjekët më të mirë në trajtimin e sëmundjeve vaskulare. Ai drejton një klinikë vaskulare dhe endovaskulare në Pforzheim, Gjermani.
Për trajtimin e zgjerimit apo ngushtimit të arterieve dhe venave nevojitet prerje kirurgjikale. Dr. Krasniqi synonte që këto ndërhyrje të realizoheshin vetëm me shpim, për t’u siguruar pacientëve rikuperim të shpejtë. Deri më tani, kirurgët i trajtonin sëmundjet endovaskulare me një shpim në ije, në drejtim të zemrës ose këmbës, jo në të dy drejtimet njëherazi. Nëse nevojitej një shpim i dytë, rrezikohej dëmtimi i arteries apo hemorragji.
“Shpikja e Dr. Krasniqit, e quajtur Krassa, mundëson trajtimin e enëve të gjakut me një shpim me gjilpërë duke mundësuar ballonimin dhe implantimin e stentave në çdo arterie dhe venë, në drejtim të zemrës dhe të këmbës, pa bërë asnjë prerje,”.
Dr. Krasniqi do të ndihmojë kirurgë, radiologë, angiologë, kardiologë dhe më e rëndësishmja, pacientë në gjithë botën.