Mbrëmë ishim të gjithë dëshmitarë të një precedenti mjaft të rëndë, ndoshta për fatin tonë të keq, edhe të një të vërtete të hidhur, që e themi si postulat, por kurrë me shumë se dje nuk e kishim vërtetuar publikisht, se jemi shoqëri e dhunshme me një mentalitet “provincial” dhe nuk druhemi ta shfaqim sapo të na jepet mundësia.
Të gjithë aktorët politikë dhe mediatik dhanë shfaqje se si dhunohet individi nga politika, media dhe shoqëria! Ditën e djeshme ishim dëshmitarë të një ngjarje mjaft të rëndë, asnjë nuk e besonte Xhisielën, “viktimën” e tyre.
E besuan kur e deshën për ta viktimizuar, e kur ju tha të vërtetën që e dinte vetëm ajo, tentuan t’i mbyllnin gojën, e bënë për të marrë, gënjeshtare, të varfër e provinciale dhe se kishte nevojë për përkrahjen e tyre meqënëse ishte pa baba, edhe pse jo e vetme në këtë botë.
Gjyqi publik i bërë nga media, si “qershia mbi tortë” pas atij politik, krijuan një precedentë mjaft të rëndë në shoqërinë tonë: I mbyllën gojën të gjithë “Xhisielave”, që kanë frikë të flasin nga paragjykimi i të tjerëve… të dhunuara sistematikisht nga shoqëria, po kurrë si dje, nga politika dhe media!/Ekskluzive.al