Sali Berisha rrezikon të humbasë mandatin e deputetit. Pas shpalljes “non grata” nga SHBA u diskutua disa herë se ai ishte objekt i ligjit të dekriminalizimit, por dje është rihapur si çështje.
Prokuroria e Përgjithshme ka mbyllur verifikimet për Tom Doshin, pas një kërkese që iu bë nga KQZ para zgjedhjeve të 25 prillit. Komisioneri Ilirian Celibashi dërgoi për verifikim në prokurori 28 emra të dyshuar se preken nga ligji i dekriminalizimit, mes të cilëve dhe Tom Doshin.
Arsyeja e kërkesës për të lidhet me shpalljen i padëshiruar në SHBA. Ambasadorja Kim e bëri të qartë se emrat “non grata” nuk kanë vend në Parlament dhe KQZ tentoi një manovër duke ia kaluar topin prokurorisë. Tom Doshi dha dorëheqjen si deputet, por prokuroria ka vijuar hetimet dhe dje ia kaloi topin po KQZ.
Organi i akuzës ka renditur dënimet për Doshin, por shprehet se i takon KQZ-së të vendosë nëse ai preket apo jo nga ligji i dekriminalizimit. Tani topi është te komisioneri Celibashi, i cili duhet të vendosë nëse shpallja “non grata” përbën shkas për të penalizuar kandidatët apo të zgjedhurit. Por precedenti “Doshi” vendos dhe fatin e ish-kryeministrit Berisha. Edhe ky i fundit është shpallur i padëshirueshëm nga SHBA, por ndryshe nga Doshi, KQZ nuk ka ndërmarrë asnjë nismë për të.
Vendimi për Doshin mund të sjellë dhe hapjen e procesit të verifikimit për Berishën, pasi nëse KQZ vendos precedentin e përjashtimi të emrave “non grata”, ish-kryeministrit i hiqet mandati i deputetit. Neni i cili mund të penalizojë Brishën, është neni 2 i ligjit të dekriminalizimit, i cili shprehet:
“Ndalimi i parashikuar nga pika 1, e këtij neni, zbatohet edhe ndaj personave: a) që janë dënuar me një vendim jopërfundimtar nga një autoritet gjyqësor i një shteti anëtar të BE-së, SHBA-së, Kanadasë, Australisë, apo për të cilët është vendosur masë sigurimi personal dhe/ose është lëshuar një urdhër kërkimi ndërkombëtar nga autoritetet e një prej këtyre shteteve, për kryerjen apo tentativën e kryerjes së një prej veprave penale, të parashikuara në pikën 1, shkronja “a”, të këtij neni. Për personat që plotësojnë kushtet e këtij paragrafi, ndalimet zbatohen në përputhje me pikën 5, të nenit 10, dhe pikën 1, të nenit 16, të këtij ligji”.
Rasti i Elda Hotit
Në KQZ pak ditë më par mbërriti një ankesë ndaj deputetes së PD, Elda Hoti, ku thuhej se ajo nuk ka deklaruar saktë të dhënat në formularin e dekriminalizimit. Një qytetar, pretendon se Hoti ka fshehur ndryshimin e emrit të babait të saj nga David Hoti, në Artan Hoti.
Shkresa që mban firmën e ankuesit Llesh Nikolli i është dërguar kreut të KQZ, Ilirjan Celibashi ndërsa për dijeni i është dorëzuar edhe kryetares së Kuvendit, Lindita Nikolla, drejtuesit të SPAK si edhe ambasadoreve të SHBA dhe BE në Tiranë. Në ditët në vijim KQZ duhet të mblidhet për këtë rast dhe nëse deputetja penalizohet, atëherë mund të kthehet sërish në precedent për t’i hequr mandatin ish-kryeministrit Berisha.
Pak ditë më parë dolën fakte në media se ai ka ndërruar datën e lindjes, por këtë gjë nuk e ka deklaruar në formularin e dekriminalizimit. Në të dhënat që janë publikuar nga regjistri fillestar i gjendjes civile, datëlindja e tij është 1 korrik 1944. Më pas ai e ka ndryshuar duke e vendosur 15.10.1944. Ky ndryshim nuk reflektohet në formularin e dekriminalizimit.
Nëse KQZ në rastin e deputetes Hoti vendos që mosdeklarimi i saktë i gjeneraliteteve sjell heqjen e mandatit, atëherë kjo mund të penalizojë edhe ish-kryeministrin. Tashmë duket se sytë janë te KQZ dhe amerikanët janë më të interesuarit të shohin vendimet finale. /Kliti Topalli