Nga Medina Mehmeti
Në Bibliotekën Kombëtare të Kosovës u promovua libri “Kalvari Diplomatik i shtetit të Kosovës”, i autorit Shaban Murati.Gjatë këtij promovimi, ambasadori Beqir Ismaili, drejtor i Akademisë Diplomatike të Republikës së Kosovës, tha se ky libër ka vlerë të madhe shkencore, diplomatike dhe ndërkombëtare.
“Në kuadër të aktiviteteve të saj, Akademia Diplomatike i kushton rëndësi të veçantë promovimit të librave. Konsiderojmë se libri ka një vlerë të madhe në lëminë shkencore, diplomatike dhe ndërkombëtare. Përvojat e ambasadorit dhe si drejtor i përgjithshëm i Akademisë në Shqipëri do të shërbejë në ngritjen e njohurive profesionale të diplomatëve të Kosovës.
Veprat e Shaban Muratit përbëjnë një gamë të gjerë të njohurive shkencore historike dhe diplomatike. Ju premtoj se Akademia Diplomatike do të jetë krahë mbështetës për promovimin e librave të tilla”, ka thënë Ismaili, raporton Ekonomia Online.Mehdi Gurra, kryetar i fondacionit Alsar, pati fjalë të mëdha për autorin.“Një shikim i hollë analitik publicistik. Kalvari është vëzhgim kritik prej një publicisti tepër aktiv.
Diplomat Kalvari, mjeshtër i madh në diplomaci njohës i shkëlqyer i diplomacisë ndërkombëtare. Botimi është një përmbledhje artikujsh të autorit të shkruara për gjatë 20 viteve, kohë gjatë së cilës Kosova i ka përjetuar të katër stinët. Ato shkrime nuk e kanë humbur aspak aktualitetin”, ka thënë Gurra.“Bagazhi i pasur diplomatik e ka lejuar autorin murati të shkruajë për hallet e diplomacisë kosovare. z.Murati shkruante dy vite më parë se Kosova ka shumë për të mësuar nga diplomacia e përplasjes së këmbëve që ka ndjekur Serbia.
Ai nuk nguron të thotë se Serbia po ngutet sepse e di se diplomacia shqiptare në ngutje hutohet. Aq kritik është z. Murati sa shkruan se vetëm Presidenti serb nuk duket i dehur në këtë katrahurë diplomatike. Prioriteti i prioriteteve është njohja e Kosovës nga Serbia”.Profesori, Ibrahim Gashi, tha se libri është një përmbledhje e shkrimeve autoriale me tematikë Kosovën.
“Shumë tema që kanë të bëjnë me të drejtat e Kosovës për operacione, çështja e kufijve, e Preshevës janë trajtuar në këtë libër”, ka thënë Gashi.Profesori, Memli Krasniqi, tha se largpamësia e autorit shihet në analizën që i bënte deklaratë të shtetarëve amerikanë në prag të Rambujes.E, autori Shaban Murati, tha se është emocion i veçantë të shkruaj për Kosovën.
“Ky është libri i tretë që kam shkruar për Kosovën. Për mua është një emocion i vecantë të jem në mjedisin tuaj sepse Kosova për mua ka qenë një dashuri profesionale. Nuk ka në Tiranë njeri qe ka shkruar për Kosovën më shumë se unë. Në krijimtarinë time nuk është se unë thjesht kam shkruar artikuj dhe i kam mbledhur këto artikuj. Unë kam pasur një parim, të zbatoj parimin e mozaikut. Kam nisur te jap portretin diplomatik. Diplomacia është një disiplinë shumë e varfër për të cilën kemi nevojë të japim mendim”, është shprehur autori i librit.