Kompania Al Global, e cila bleu së fundmi rafinerinë e bitumit të ARMO-s në Fier, ka vënë në sekuestro disa prona të kompanisë problematike ARMO dhe të shoqërisë të naftës, Taci Oil International & Supply Company.
Sipas njoftimit të përmbaruesit EPSA, kjo e fundit ka proceduar me veprimin përmbarimor të sekuestrimit të sendeve të paluajtshme Truall + Ndërtesë si dhe sendet e luajtshme Asete Pajisje Makineri (Teci) Armo në Balish, Mallakastër, të cilat janë lënë si barrë siguruese për garantimin e kredive të marra nga ARMO në vitin 2012 te Raiffeisen Bank. Burime nga përmbaruesit pohuan për Monitor se kredia është blerë nga Al Global i cili është tashmë kreditori dhe ka kërkuar sekuestron e pasurive.
Përmbaruesi ka kërkuar dhe ndihmën e policisë së Mallakastrës për veprimin e kryer në datën 10 prill, pasi vlerësoi se në kryerjen e veprimit përmbarimor mund të hasej me probleme nga debitorët dhe personat e lidhur me ta.
Në janar të këtij viti AL.Global Oil, bleu në ankand nga Banka Raiffeisen për 5 milionë dollarë uzinën e prodhimit të bitumit të rafinerisë ARMO, e cila ndodhet në Fier. Blerësi është një kompani e krijuar në vitin 2016 dhe aksionerë të saj janë Arjan Dhimertika, Qazim Qazimi dhe Ridgers Mema.
Ndërsa në bordin mbikëqyrës të kompanisë janë dy sipërmarrës të njohur në fushën e naftës, Shefqet Kastrati i grupit më të madh të naftës në vend, “Kastrati” dhe Frident Kuqi i “Europetrol Durrës Albania”, operatori i dytë më i madh i naftës në vend. Aktiviteti do të zhvillohet në një sipërfaqe prej 70 mijë metrash katrorë të vendosur në dispozicion të Uzinës e ndodhur në Jug Perëndim të Azotikut në kompleksin industrial të Fierit.
Kapaciteti i projektuar përpunues i Impiantit të Distilimit është 500 000 ton/vit nafte bruto. http://www.monitor.al/al-global-oil-gati-te-vere-ne-pune-unizen-e-fierit-qe-e-bleu-nga-armo-perpunim-500-mije-tonevit-nafte-bruto/
Historia e komplikuar e ARMO
ARMO, aktualisht kompania më problematike në Shqipëri, është krijuar në vitin 1999 si kompani shtetërore, ka dy rafineri, atë të përpunimit të naftës në Ballsh dhe të bitumit në Fier.
Në vitin 2008 ARMO u privatizua nga grupi Taçi Oil, që mori në kontroll 85% të aksioneve të ARMO nëpërmjet kompanisë Anika Mercuria Rafinery Associated Oil, AMRA Oil, për 128 milionë euro.
Në vitin 2013, azerët e Heaney Assets Corporation blenë paketën e aksioneve të AMRA Oil. Azerët e përdorën për pak kohë kompaninë dhe më pas u tërhoqën. Në 2014-2015, përmes qiradhënies ARMO-n e shfrytëzuan Deveron Oil Albania, TPD-Trading Petrol & Drilling.
Nga tetori 2016 deri ne fund të vitit 2017, rafineria e naftës ishte në përdorim nga kompania offshore IRTC, e cila së fundmi e braktisi atë duke të paktën 40 milionë euro taksa të papaguara dhe punonjësit pa paga. Këta të fundit filluan protestat.
Nw total, detyrimi tatimor i krijuar në vite nga ARMO është rreth 260 milionë euro (pa llogaritur fshirjet e detyrimit të para vitit 2010 për shkak të amnistisë fiskale).
Aktualisht një tjetër kompani offshore Byllis Energji është në negociata me punonjësit për të rifilluar aktivitetin në rafinerinë e naftës në Ballsh. http://www.monitor.al/skenari-komplikuar-armo-pas-allum-ne-skene-del-dhe-nje-tjeter-offshore-byllis-energji/