Zyra e ish Kryeministrit, Hashim Thaçi ka shpenzuar 600 euro vetëm për 5 verëra italiane ‘Brunello di Montalcino’.
Ne restorantin ‘Pjata’ në tetor të 2011-tës janë shpenzuar 800 euro për një drekë zyrtare, ku 600 nga to kishin shkuar vetëm në verëra.
Ndërsa 200 të tjera janë shpenzuar për raki shtëpie, kallamari, salmon, pasta, djathëra, këpurdha të pjekura, kafe e ujë.
Zyrtarisht në Kallxo.com ka nisur publikimin e faturave të shpenzimeve të Presidentit Hashim Thaçi në kohën kur ai ishte kryeministër i vendit.
Në dosjen prej qindra faturash të siguruar pasi BIRN ka paditur Zyrën e Kryeministrit në gjykatë, do publikohen fatura të shpenzimeve për 20 muaj qeverisje të Hashim Thaçit përfshirë këtu shpenzimet e 5 zëvendëskryeministrave tjerë të asaj kohe: Bujar Bukoshi, Edita Tahiri, Hajredin Kuçi dhe Behgjet Pacolli
Pjesë e faturave janë edhe shpenzimet e kryera nga këshilltarë e shefa të kabineteve e deri te bodigardët e qeveritarëve të lartë.
Në dosjen “Sa han Shefi” e cila tashmë është aktive në kallxo.com, çdo ditë do publikohen fatura të reja të shpenzimeve të shoqëruara me shkrime dhe dëshmi për shpenzimet.