Pagat vazhduan rritjen konstante edhe përgjatë tre muajve të fundit të vitit të kaluar, por ajo që bie më shumë në sy është se në sektorin e ndërtimit, pagat e punonjësve u rritën me 15% në krahasim me tremujorin e fundit të vitit 2023, duke arritur në 67 mijë lekë, sipas të dhënave nga Instituti i Statistikave.
“Rritja e pagave nuk ka ardhur për shkak të shtimit të inspektimeve nga Inspektorati i Punës, por si rezultat i kërkesës së madhe për punëtorë.
Tregu i ndërtimit po e vuan shumë këtë situatë, sepse kemi një ‘boom’ ndërtimesh, ndërkohë që numri i punëtorëve mbetet i kufizuar. Për këtë arsye, po importohen punëtorë nga vendet e treta, çka po përkthehet në kosto më të larta” – u shpreh eksperti i pasurive të paluajtshme, Ervin Demirxhiu.
Por, një ndikim në rritjen e pagave në këtë sektor kanë patur edhe aksionet kundër informalitetit. Mungesa e fuqisë punëtore nuk pritet të sjellë vetëm një rritje të pagave për punonjësit e këtij sektori, por ndikon drejtpërdrejt edhe në rritjen e çmimit të apartamenteve për shkak të shtimit të kostove të ndërtimit.
“Sigurisht, ky faktor ka një peshë të konsiderueshme në çmimin e produktit final. Punonjësit e sektorit të ndërtimit po paguhen më mirë, çka rrit kostot dhe pasqyrohet në çmimin përfundimtar të shitjeve të apartamenteve” – tha eksperti Demirxhiu.
Sipas të dhënave të Institutit të Statistikave, përgjatë vitit të kaluar u dhanë rreth 1,336 leje ndërtimi, duke qëndruar në nivele të larta dhe bërë që kërkesa për fuqi punëtore të mbetet e lartë.