Veniten shpresat e non grata Sali Berisha për të fituar gjyqin në Francë kundër Sekretarit Amerikan Antony Blinken.
Ky i fundit bëri një padi në Francë, por ende nuk kemi një zhvillim me këtë çështje. Vetë Berisha e ka pranuar dje në një intervistë televizive se që prej tetorit nuk ka pasur zhvillime për shqyrtimin e padisë dhe sinjalet janë se ajo po shkon drejt kalendave greke.
“Unë mund t’u them se dorëzimi në protokoll është bërë në 28 korrik, gjykatësi e ka marrë në 22 tetor, por se çfarë do të vendosë gjykatësi unë nuk kam asnjë ide. Ka dy pro të forta dhe dy kundra. As Blinken dhe as gjykatësi nuk janë francezë. Për shpifje deputeti nuk ka imunitet.
Kam zgjedhur dy drejtime pune: e para gjykatën dhe e dyta kam zgjedh transparencën, unë kam arritur diçka në këtë mes. Kam pasur shumë oferta se me lobim kjo hiqet, por nuk kërkoj të hiqet, unë kërkoj të bëj këtë betejë që po bëj. Më është thënë se ligji nuk të kap ty se ty se ishe pension, por të tjerët”, tha Berisha në një studio televizive.
Saliu mbrëmjen e djeshme gjatë një intervistë në RTSH u pyet edhe nëse kemi një datë për seancën e parë në Gjykatën e Parisit. Berisha tha se me procedurat merret avokati i tij dhe ai nuk është marrë asnjë moment me këtë çështje. “Nuk e di kur do kemi një datë. Atë e ka gjykatësi, nuk e kam unë. Unë kam një avokat që merret me këtë çështje, nuk e di unë. Avokati është një burrë i famshëm në Francë dhe Europë. Unë nuk kam harxhuar asnjë sekondë”, tha Berisha.
Berisha sulmon Kim
Non grata Sali Berisha, ka deklaruar se ambasadorja e Shteteve të Bashkuara të Amerikës në Shqipëri Yuri Kim ka arrogancë të tepruar. Teksa mbrëmjen e djeshme ka përmendur një nga deklaratat e bëra nga ambasadorja Yuri Kim ku më herët përdori sloganin që demokratët të “mos hanë bar”, për të nënkuptuar nevojën e shkëputjes së Partisë Demokratike nga interesat e ish-kryeministrit Sali Berisha, ai tha se ndonëse ai i kërkoi ambasadores që t’u kërkonte falje shqiptarëve.
Sipas tij, ambasadorja nuk e bëri një gjë të tillë. “Zonja e cila vjen nga vendi i madh i lirisë dhe përfaqëson vendin e lirisë përdori citatet e Enver Hoxhës për të fyer shqiptarët, përdori barin. Atyre që u kujtohet Enver Hoxha u thoshte shqiptarëve që bar do hamë dhe amerikanëve nuk do ti nënshtrohemi. Që një diplomate përfaqësuese e vendi që kontribuoi të përmbyste komunizmin, të citojë Enver Hoxhën ajo o ka qenë anëtare e grupeve leniniste dhe ka studiuar Enver Hoxhën ose pastaj është keq këshilluar.
Por, ndaj kësaj deklarate unë i kam kërkuar asaj që tu kërkojë ndjesë shqiptarëve për një fyerje të tillë. Nuk e bëri se arroganca nuk është virtyt dhe kur bën një fyerje kolektive njeriu edhe ndaj një fyerje individuale duhet të kërkojë ndjesë, po ndaj një fyerje kolektive vetëm një arrogancë e papërmbajtur të pengon të kërkosh ndjesë. Nuk e kam armike”, tha ish-kryeministri.