Bajram Yzeiraj, ish-drejtuesi i Policisë së Tiranës, ish-ministër dhe zëvendësministër, në një rrëfim në studion e Shqip nga Rudina Xhunga në Dritare TV, ka folur për ngjarjet e vitit 1997 ku akademia ku përgatiteshin studentët u zhvendos në Delvinë dhe përpjekjet që u bënë për të shfrytëzuar këta student në shërbim të vendit.
“Në vitin 1997 unë isha pedagog në Akademinë e Policisë. Asokohe drejtuesi i Akademisë Hysen Arapi mbante qëndrime politike.
Në zgjedhjet e vitit 1996 u morën studentë nga Akademia për të ndihmuar policinë në nivel vendor. Ishte e vështirë për studentët sepse ishte një hap i madh nga shkolla në terren. Kur ata u kthyen më thanë:
“Profesor, kemi bërë diçka të keqe, na vret ndërgjegjja; kemi rrahur njerëz, kemi zhdukur kuti.” Bëhej fjalë për zonat Burrel, Milot, Laç, Rrëshen. Këtë ma thanë studentët e mi.
Pra, studentët kishin marrë kutitë e votimit në zgjedhjet e vitit 1996. Tjetër gjë iu mësuam atyre studentëve në shkollë për ligjet dhe tjetër gjë i detyroi sistemi të bënin.
Erdhëm në atë ditë ku, në vitin 1997, shkolla, me urdhër të organeve vendimmarrëse, u mor, u mashtrua, u gënjye nga ish-drejtuesi i shkollës.
Ai ishte një ushtarak politik dhe i çoi studentët në Delvinë të Gjirokastrës, dhe aty i vunë në formacion ushtarak me automatikë. Do të luftonin ca grupe njerëzish që iu kishin marrë lekë dhe armë dhe lëviznin nëpër Delvinë. P
ër fat, shefi i katedrës së kufirit asokohe, kur e kuptoi se si ishte e vërteta, e kundërshtoi gjeneralin Hysen Arapi. E kundërshtoi dhe i tha që prindërit na i kanë besuar studentët për t’i mësuar, jo për të luftuar vëllezërit e tyre. I tha studentëve që të hipnin në makinë me të.
Ai oficeri ishte një oficer shembullor sepse e kuptoi se si po gënjeheshin dhe arriti t’i kthente studentët në shkollë shëndoshë e mirë, sepse mund të ishte vrarë ndonjëri. Dhe ai oficer duhej të ishte dekoruar për atë që bëri.
Janë dekoruar njerëz që kanë djegur duke i quajtur pishtarë të demokracisë, ndërsa për oficerë të tillë nuk u kujtua askush. Duhet theksuar se akademia është një shkollë, nuk është municion rezervë, nuk duhet të përdoret”, tha Bajram Yzeiraj.