Ditën e enjte të kësaj jave, prokurori Gjergji Tako ju drejtua me një fletë-thirrje kryedemokratit Lulzim Basha, Arben Ristanit, Gazmend Bardhit dhe Ilir Dervishit, por çuditërisht të katër zyrtarët e PD nuk u paraqitën në ambjentet e prokurorisë. Sipas burimeve të prokurorisë fletë-thirrja kishte për qëllim që katër zyrtarët të pyeteshin në prokurori si persona që kanë dijeni për ngjarjen.
Nevojshmëria për të pyetur për të dytën herë këta katër zyrtarë lindi pasi prokuroria e Tiranës u njoh me prova dhe fakte të reja që kanë mbërritur në adresë të saj, nëpërmjet dy letërporosive nga SHBA dhe Skocia. Këto dy letërporosi që për hir të së vërtetës mbahen shumë sekret nga prokuroria, japin një tablo të plotë të transfertave bankare dhe lidhjen e kontratave të lobimit që PD ka bërë me kompanitë amerikane dhe skoceze, që në fakt pronarët e tyre janë shtetas Rusë.
Për këto të dhëna të reja që kanë dalë nga përgjigjet e letërporosive Basha, Bardhi,Ristani dhe Dervishi u thirrën të enjten në prokurori për të dhënë shpjegime të dyta, pasi është e domosdoshme për hetuesit që këta persona të pyeten për provat e reja që kanë mbëritur. Por çuditërisht të katër zyrtarët e PD, kanë refuzuar të paraqiten në prokurori me argumentin nuk duan të njihen me aktet hetimore.
Por sipas burime të prokurorisë vetë PD e keqinterpretoi qëllimin e fletë-thirjeve, pasi njohja me aktet hetimore sic shkruante PD në letrën dërguar prokurorisë, sipas prokurorëve është një procedurë që i komunikohet personave nën hetim ose personave të pandehur. Kjo procedurë kryhet në fund të fazës së hetimit. Sipas prokurorëve Basha,Ristani, Dervishi dhe Bardhi janë thirrur në prokurori për herë të dytë me qëllimin e vetëm për tu pyetur si persona që kanë dijeni mbi rrethanat e ngjarjes, dhe jo si persona nën hetim apo qoftë edhe të pandehur.
Në pamundësi për të realizuar ditën e enjte pyetjen e katër zyrtarëve, prokuroria e Tiranës pritet të ripërsëritë fletë-thirjen këtë javë për Lulzim Bashën, Arben Ristanin, Ilir Dervishin dhe Gazmend Bardhin. Nëse sërisht zyrtarët e PD do refuzojnë ti përgjigjën fletë-thirjes së prokurorisë, atëherë do aplikohet shoqërimi i tyre me forcë në polici, ku dhe do realizohet pyetja e katër personave.
Në prag të fushatës elektorale për zgjedhjet parlamentare të 25 qershorit 2017, Partia Demokratike e udhëhequr nga Lulzim Basha lidhi dy kontrata me lobistin e saj në Uashington, “Stonington Strategies”, në mënyrë që të siguronte takime të nivelit të lartë me administratën e Presidentit Donald Trump. Por dy vite pas këtyre kontratave, Lulzim Bashës, do i duhet të japë llogari në prokurori para zgjedhjeve lokale që pritet të zhvillohen në qershor të 2019.
Më 14 nëntor 2017, “Stonington Strategies” raportoi në Departamentin e Drejtësisë se ka marrë dy pagesa nga Partia Demokratike me vlerë totale 525 mijë USD dhe një pagesë të tretë nga “Biniatta Trade LP” në vlerën e 150 mijë USD. Asnjëra prej këtyre pagesave nuk rezulton e deklaruar në raportin financiar të dorëzuar nga PD në Komisionin Qendror të Zgjedhjeve për zgjedhjet e 25 qershorit, çka ngre dyshime serioze për origjinën e parave.
Gjithashtu, mbetet e paqartë se cila është marrëdhënia mes Partisë Demokratike dhe kompanisë “Biniatta Trade LP,” e cila është në pronësi të një zinxhiri kompanish të regjistruara në Belizë- nje shtet i Amerikës Qendrore i njohur si parajsë fiskale. Përveç dy kontratave të lidhura me “Stonington Strategies,” gjatë të njëjtës periudhë PD ka lidhur edhe një kontratë me kompaninë lobiste “Barnes and Thornburg LLP” në fillim të prillit me vlerë 150 mijë USD. Në total,shpenzimet e Partisë Demokratike për lobistët në Uashington për periudhën mars- qershor kapin vlerën e 825 mijë USD- më e lartë se të ardhurat totale që Partia Demokratike deklaroi në KQZ.