Tomas Myler humbi një rast të artë për të barazuar ndaj Anglisë në ndeshjen ku Gjermania humbi 2-0 dhe u eliminua.
Por futbollisti i Bajernit mund të mos ketë faj për atë gabim, nëse marrim në konsideratë fjalët e iluzionistit Uri Geler, i cili ka marrë meritat për gafën e Mylerit.
Ndeshjet, por edhe turnetë në tërësi, mund të varen nga një aksion. Një gol i humbur, apo shënuar, bën diferencën mes fitores dhe humbjes.
E di mirë Tomas Myler, që është gjendur në të dyja anët e barrikadës në dy ndeshje të rëndësishme. Në 2014-ën, në finalen e Botërorit të Brazilit, ai pa Gonzalo Higuainin të gabonte përballë Nojerit. Kurse në 1/8-at e Euro 2020 ndaj Anglisë i takoi atij të kishte shansin e barazimit, por gjuajti jashtë portës së Pikford.
Me një postim në Instagram, Myler kërkoi ndjesë për gabimin, por tani, një lajm nga Izraeli mund t’ia heqë fajet bavarezit. Iluzionisti Uri Geler ka shpjeguar se ishte ai që e bëri të gabonte Mylerin me forcën e mendjes. Geler, me pasaportë britanike, për “Jewish Telegraph” është shprehur:
“Nuk ka dyshime që jam unë në këtë mes. Po shkoja në skenë, isha prapa siparit dhe kunati im po shihte ndeshjen në telefon. Edhe saksofonisti po shihte ndeshjen dhe mund të dalë garant se kur Myler goditi, unë thashë ‘një, dy, tre, humbe’.
Kur pashë që Anglia kishte fituar, dola në skenë dhe të gjithë duartrokitën. Nëse shihni përsëritjen e rastit, do të surprizoheni. Fuqia e mendjes është shumë e madhe”. E mjaftueshme për të humbur një gol të sigurt…