Kryeministri Edi Rama ka reaguar për tensionet në Veri të Kosovës.
Ai shkruan se këto tensione nuk ndihmojnë në normalizimin e marrëdhënieve dhe as në njohje të ndërsjellë mes Kosovës dhe Serbisë.
Rama këshillon që të mos ecet më tej në këtë shteg të rrezikshëm.
“A e ndihmon kjo që po ndodh në Kosovë procesin ku janë angazhuar të tërë miqtë e mëdhenj të Kosovës e të shqiptarëve, për normalizim dhe njohje të ndërsjellë mes Kosovës dhe Serbisë?!
Me siguri jo përderisa vetë miqtë tanë më të mëdhenj shprehen thellësisht të shqetësuar!
Unë bashkohem me ta në apelin për të mos ecur më tej në këtë shteg jo vetëm të rrezikshëm, po edhe krejt të panevojshëm sot, kur bota demokratike e ka vendosur në qendër të vëmendjes dialogun, normalizimin, njohjen e ndërsjellë mes Kosovës dhe Serbisë”, shkruan Rama.
Edhe ambasadori amerikan në Prishtinë Jeffrey Hovenier ka dënuar aksionin e policisë kosovare për të hyrë në ndërtesat komunale dhe bën apel që të ndërpriten menjëherë masat e dhunshme të marra ditën e sotme.
“Shtetet e Bashkuara dënojnë veprimet e vazhdueshme të autoriteteve kosovare për të hyrë në ndërtesat komunale në veri të Kosovës. Masat e sotme të dhunshme duhet të ndërpriten menjëherë”, ka thënë ambasadori amerikan në Prishtinë, Jeffrey Hovenier.
Thirrja e fundit ishte e Sekretarit të Shtetit Blinken. Uashingtoni zyrtar, ultimatum Albin Kurtit: Ndalo menjëherë veprimet e dhunshme