Kryeministri Edi Rama deklaroi nga foltorja e parlamentit se Partia Demokratike kur ishte në pushtet ka kërkuar të privatizojë Teatrin e Metropolit. “Florion Mima i ka dërguar një shkresë Bashës ku kërkonte privatizimin e Teatrit të Metropolit për llogari të deputetit Astrit Veliaj”, u shpreh ai.
Rama për opozitën në Vlorë:
“Shumë shkurt dua të sjell në vëmendje një shembull kuptimplotë të asaj që është dyfytyrësia e përditshme e atyre që sot mungojnë këtu edhe pse teatrin e kishin lancuar si kalin e tyre të betejës.
Mungojnë sepse kanë shkuar në Vlorë për të dëshmuar se si po digjet Vlora. Koha shumë shpejt do të na japë provën nëse Vlora po digjet apo nëse Vlora po ecën në rrugën e Rilidnjes së saj të pakthyeshme. Mjafton të kemi durimin e të presim edhe muajt që na ndajnë nga zgjedhjet e ardhshme. Ndërkohë që për këdo ka ngenë të ndjekë shifrat dhe ta bazojë gjykimin në fakte, mjafton të shohë se si ishte situata e kriminalitetit në Vlorë vetëm 5 vite më parë me shifra dhe si është sot. Nata me ditën. Sigurisht që nuk është një ditë me diell ka ende shumë për të bërë por është ditë nuk është më natë”, u shpreh Kryeministri.
Rama: Tek Teatri do bëhej pallat
“Kam një shkresë të cilën Florian Mima, ministër i Ekonomisë ja dërgon Lulzim Bashës kryetar i bashkisë e çfarë i kërkon. I kërkon privatizimin e Teatrit të Metropolit, në kllapa shënon Floriani, Teatri i Estradës për llogari të deputetit Astrit Veliaj. I vetmi aset kombëtar në dispozicion të bashkisë së Tiranës i transformuar nga një kafene e degraduar në një teatër të Metropolit para se Basha të shkonte në bashki çohet për privatizim jo për PPP as për të ndërtuar një teatër të ri të metropolit në këmbim të kontributit të zotit Veliaj dhe në funksion dhe të një përfitimi legjitim të zotit Veliaj pasi të investonte për teatrin e ri por për t’u privatëzuar për pallat”, deklaroi Rama.