Kryeministri Edi Rama pas takimit që zhvilloi sot me qytetarët e Malësisë së Madhe, ku konfirmoi edhe Tonin Marinajn si kandidat për PS-së në zgjedhjet lokale të 30 qershorit, ndërsa ka ndaluar në këto momente edhe në qytetin e Shkodrës.
Shefi i qeverisë u ndal me studentët teksa po vizitonte godinën e re të Fakultetit të Ekonomisë në Universitetin “Luigj Gurakuqi”. Pas një bisede të shkurtër me njërin prej tyre, kryeministri u përshëndet me ta dhe mori drejtimin për në hyrje të godinës, e cila ndodhet mes Fakulteti Juridik dhe atij të Shkencave Shoqërore.
Një student tha se janë në pritje të hapjes së godinës së fakultetit, por për këtë shtoi se duhet të presin të paktën edhe 45 ditë.
“Presim 45 ditshin dhe shpresojmë se të mos jetë një fjalë më shumë dhe të vazhdojmë rregullisht mësimin aty ku na takon ne dhe nuk na është vënë në dispozicion prej 5 vitesh. Ne do të presim 45 ditë. Ishte fjalë e kryeministrit. Shpresojmë të mos jetë një premtim më tepër, të mos jetë një fjalë më tepër përballë studentëve dhe shqetësimeve të studentëve.
Ndërkohë një tjetër pohoi se Shkodra është qyteti, i cili nuk ka marrë asnjë fond nga Pakti për Universitetin. Ai tha se nëse nuk plotësohen kërkesat e studentëve, atëherë të drejtat e tyre do t’i përmbushin përmes protestave.
“ Fatkeqësisht pyetjet tona mbetën pa përgjigje. Qyteti i Shkodrës është përjashtuar nga çdo fond dhe nga çdo investim të paktën nga Pakti për Universitetin. Shpresojmë që studentët e Shkodrës të marrin të drejtat e tyres qoftë edhe përmes kohës, qoftë edhe nëpërmjet demonstratave”-tha një tjetër student.