Bllokimi i Aeroportit të Rinasit nga greva e kontrollorëve për kryeministrin është i nxitur politikisht.
“Ka ndodhur një akt i paimagjinueshëm, është marrë peng aktiviteti i aeroportit nga një grup i nxitur drejtpërdrejt nga Sali Berisha dhe Ilir Meta. Po përdorin një gur me emrin Leshko.
Kupton edhe një herë se si Ilir Meta dhe Sali Berisha janë në këtë përpjekje për të rrëzuar Qeverinë tonë, duke rrezikuar shtetin. Kanë bllokuar edhe vaksinimin. Por nuk do t’ia arrijnë. Kanë gjetur Qeverinë dhe Kryeministrin e gabuar. Unë shpresoj shumë dhe u bëj thirrje punonjësve që të kthehen në detyrë një orë e më parë”.
Pasi shpjegoi arsyet e uljes së pagave për kontrolloret kryeministri flet dhe për dëmin që i shkakton vendit ky bllokim.
“Paga është ulur si rezultat i pandemisë që ka goditur kudo dhe ka goditur më së shumti sektorin e transportit. Aktualisht e kanë mbi 2400 dollarë dhe nuk pranojnë të punojnë me këtë rrogë. I kanë bërë llogaritë gabim por plani i tyre për të mbyllur aeroportin mundësisht deri në zgjedhje dhe plani për goditjen e sigurisë kombëtare do të dështojë.
Bllokimi i aeroportit bllokon ardhjen e vaksinave, bllokon lëvizjen e qytetarëve. Këta të gjithë janë socialistë, demokratë, me bindje të ndryshme dhe goditen po njësoj në emër të asaj politike ogurzezë për Shqipërinë, ekonominë e këtij vendi, të ardhmen e këtij vendit”.
Rama thotë se e di dhe arsyen përse bllokimi i aeroportit ndërkombëtare Nënë Tereza erdhi në këtë moment, e që sipas tij lidhet me hapjen e aeroportit të ri të Kukësit.
“Për pak ditë hapim aeroportin e Kukësit, mbase dhe hapja e aeroportit të Kukësit ka qenë një nga motivet që shtynë Ilirin dhe Saliun në sulmin e çmendur në aeroportin e Rinasit”.
Takimin elektoral në Tepelenë e shfrytëzoi për të folur dhe për gjyqin e humbur të shtetit shqiptar me sipërmarrësin italian Francesco Beçhetin siguroi se nuk do të marrë asnjë qindarka nga paratë e shqiptarëve.
“Ai marifetçiu bashkë me Ilir dhe Saliun do të marrin atë që nuk thuhet, atë që ngelet dhe nuk hahet. Ai marifetçiu i paskrupullt kërkohet nga drejtësia e shqiptarëve dhe nuk do të marrë asgjë nga paratë e shqiptarëve”.