Kryeministri Edi Rama, ka paralajmëruar të tjera ndryshime në radhët e policisë. Këtë e bëri të ditur, gjatë një takimi me përfaqësuesit e Policisë së Shtetit, nga ku paralajmëroi se do të ketë lëvizje në të gjithë piramidën e uniformave blu, deri në nivel komisariatesh.
Rama thekoi se polica do të hyjë sipas tij, në një proces shkundje të fortë. “Së pari, dua t’i uroj punë të mbarë të gjithë drejtuesve të rinj të qarqeve dhe duke shpresuar që këto lëvizje, që do të shoqërohen me lëvizje të mëtejshme në të gjithë piramidën e policisë së Shtetit, deri në nivelin e komisariateve, të vlejnë për një rienergjizim të domosdoshëm në një fazë të re, ku hyn reformimi dhe transformimi i mëtejshëm i Policisë së Shtetit.
Patrullat e rendit, forcat “Shqiponja”, Policia Rrugore dhe Policia Kufitare do të hyjnë në një proces shkundjeje shumë të fortë”, tha kreu i qeverisë. Ndër të tjera, kryeministri i cilësoi si të pajustifikueshme rastet e shtuara të marrjes së ryshfeteve dhe korrupsionin në radhët e uniformave blu. Sipas kreut të qeverisë, një pjesë e tyre duhet që të largohen nga policia dhe duhet të dërgohen përpara drejtësisë.
“Policia e Shtetit është botërisht e respektuar si një nga institucionet me besueshmërinë më të lartë dhe cenimet etike si dhe lëndimet e imazhit të saj po ashtu edhe rishfaqja kohët e fundit e rasteve të korrupsionit e kanë dëmtuar.
Janë rritur rastet e korrupsionit te efektivët e Policisë Rrugore dhe SHÇBA duhet që të veprojë. Është e papranueshme që të ushtrohet presion ndaj shoferëve për ryshfet, është e pajustifikueshme se më gjithë rritjen e forcës ndëshkuese të policit rrugor, falë ndryshimeve të fundit në Kod Rrugor, qytetarët të mos ndiejnë një ndryshim thelbësor në disiplinën e qarkullimit rrugor”, tha ai.
Rama flet për ndërtimet pa leje
Kryeministri Edi Rama, ka folur edhe mbi ndërtimet pa leje në zonat turistike e të mbrojtura. Ai u shpreh se ndërtimet pa leje, bëhen në sy të policëve. Rama u bëri thirrje policëve që të veprojnë dhe të marrin masa në rast se konstatojnë ndërtime pa leje. “Ndërtimet pa leje në zona turistike të mbrojtura natyrore, arkeologjike.
Bëhen ndërtime pa leje brenda vijës së verdhë të bashkive, hidhet beton, çfarë bën Policia e Shtetit në ato kuadrate që janë të ndara qartësisht mes komisariateve, kthen sytë nga ana tjetër. Është si çdo krim tjetër madje me dënime shumë të rënda, këto skena krimi zhvillohen në sy të policëve që kanë detyrim ligjor të veprojnë menjëherë”, deklaroi ai.
Sakaq, kryeministri Rama, përmendi edhe ngjarjen e rëndë të një përplasje me armë në Sarandë në një bar. Rama tha se ata pronarë që krijojnë hapësira të tilla abuzimi janë tutorët e Policisë së Shtetit dhe sipas tij duhej përjashtuar i gjithë zinxhiri komandues.
“Kush janë këta pronarë lokalesh në zonën bregdetare që në mënyrë të hapur shkelin ligjin e tejkalojnë orën policore? Krijojnë hapësirë abuzimi që degjeneron deri në krisma dhe plagosje në mes të një dynjaje të tërë. Këta janë tutorët e policisë në atë territor. Rasti i Sarandës ishte alarmant. Ai rast duhet të çohet në ndëshkimin penal të gjithë zinxhirit të komandës në Sarandë”, tha Rama.