Kryeministri Edi Rama deklaroi se kryetarit të bashkisë së Tiranës, Erjon Veliajt po i bëhet një linçim publik.
Në konferencën e fundvitit me gazetarët, Rama tha se jemi në kushtet e një amullie, të ngjashme me çorbë derrash që nuk mund të jetë arsye për të marrë qëndrime politike për momentin.
“Krahasimi është pa këmbë, janë dy raste dhe dy kontekste dhe dy faza të ndryshme. E para, e dyta këtu jemi në kushte kur Veliaj është hetuar gjykuar dënuar në gjykatën e politikës dhe atyre mediave që janë të angazhuara për të bërë gjyqësi alternative.
Do të thotë me mjetet e politikës dhe komunikimit mediatik, të vendosë kolektiv i caktuar njerëzish se kur bëhet fjalë për SPAK si organizatë kriminale, kur bëhet fjalë për një rast që po është kështu, kur bëhet fjalë për një rast që nuk është kështu.
Në kushtet kur është linçuar publikisht, i votuar nga populli për 3 mandate rresht, protagonisti i transformimit të qytetit, atëherë këtu jemi në kushtet kur ka shumë për të menduar dhe reflektuar.
Ndërkohë që nuk jemi në kushtet kur është shpallur ndonjë kauzë publike me gjithë argumente përkatës, jemi në kushtet kur ka fjalë, thashetheme, SMS. Një SMS pa emër që nuk kuptohet se kujt i është ngritur.
Jemi në kushtet e një amullie shumë të ngjashme me një çorbë derrash që nuk mund të jetë arsye për të marrë qëndrime ne sot. Ne do shohim evoluimin dhe në kohën e duhur do mbajmë qëndrimet tona”, tha Rama.
Kryeministri Edi Rama u shpreh se kryebashkiaku Erion Veliaj, është zgjedhur nga qytetarët për tre mandate radhazi dhe është protagonisti kryesor i transformimit të Tiranës, falë mbështetjes së qeverisë dhe Partisë Socialiste. Rama tha se ndaj tij ka vetëm thashetheme.
“Në kushtet kur kjo gjykatë dhe Prokurori alternative është relativizuar kaq shumë për të linçuar publikisht një udhëheqës të PS-së, Kryetarin e Bashkisë së Tiranës, votuar nga populli për tre mandate rresht, protagonistin e transformimit të qytetit me mbështetjen e qeverisë dhe PS-së, atëherë këtu jemi në kushtet ku ka shumë për të menduar dhe reflektuar.