Lufta në Gaza mes Hamasit dhe Izraelit, ka lënë në hije festimet e Krishtlindjeve në qytetin e Betlehemit, në Bregun Perëndimor, që historikisht njihet si vendlindja e Jezu Krishtit.
Në vend të festimeve, ky qytet është në zi dhe nuk do të ketë festa muzikore, ceremoni apo edhe dekorime ekstravagante, shkruan New York Times.
Këtë vit, edhe skena tradicionale e lindjes së Jezu Krishtit në një kishë luterane në Betlehem mori një kuptim tjetër.
Jezu Krishti nuk është i vendosur kësaj here në një djep të improvizuar me sanë dhe dru, por, është i vendosur mes rrënojave, gjegjësisht tullave të thyera, gurëve dhe pllakave që përfaqësojnë shkatërrimin në Gaza.
Ai është mbështjellë me një ‘keffiyeh’, shalli me kuadrate bardhë e zi, që është bërë një simbol i identitetit palestinez.
“Jemi të thyer nga imazhet e fëmijëve që nxirren nga rrënojat, ditë pas dite. Jemi ngjitur pas ekraneve tona”, tha Munther Isaac, pastori në Kishën Ungjillore Luterane të Krishtlindjeve që krijoi këtë djep të imrpovizuar.
“Zoti është nën rrënojat në Gaza, këtu e gjejmë Zotin tani”, thotë ai.
Lufta filloi më 7 tetor, kur Hamasi nisi një mori sulmesh në Tel Aviv dhe me pjesëtarët e tij vërshuan komunitetet jugore të Izraelit, që mbetën të vrarë rreth 1,200 izraelitë. Në përgjigje të këtyre sulmeve, Izraeli nisi bombardimin e Gazës dhe mobilizoi forcat tokësore atje për të eliminuar Hamasin.
Derisa konflikti hyn në muajin e tretë, disa nga imazhet më tronditës të shkrepura në Gaza kanë qenë të fëmijëve të vdekur palestinezë të nxjerrë nga rrënojat e sulmeve ajrore.
Gati gjysma e popullsisë prej 2.2 milionë banorësh në Gaza, janë fëmijë dhe rreth 70 për qind e të vrarëve janë gra dhe fëmijë, sipas Ministrisë së Shëndetësisë së Gazës dhe Kombeve të Bashkuara.
Sipas të dhënave, rreth 20 mijë palestinezë janë vrarë që nga fillimi i luftës.