Avokat Dritan Jahaj ka komentuar sot për ‘ABC Live’ dënimin dhe arrestimin e ish-ministrit të Brendshëm Saimir Tahiri, pasditen e 4 shkurtit.
Ndërsa komentonte vendimet e gjykatës, Jahaj tha se ish-ministri e ka pritur verdiktin e gjykatësve me forcë dhe me qytetari. Sipas tij, qëndrimi i Tahirit mund të cilësohet si historik nëse e krahason me pushtetarë të tjerë që mund të kenë pasur probleme me drejtësinë.
“Nuk mungoi në asnjë seancë. Besojmë akoma, vlerësojmë se Gjykata e Lartë do të arrijë të vlerësojë argumentet tona, cënueshmërinë e Gjykatës së Apelit, në shkelje shumë të rëndë të ligjit në këtë vendimmarrje që kanë marrë.”, tha ai.
Avokati Jahaj thotë se vendimi i gjykatës e ka rënduar pozitën e Tahirit.
“Gjykata e shkallës së parë kishte vendosur masë sigurimi, shërbim prove, tani Apeli në argumentet e tij paraqiti, për aq sa paraqiti në ato pak minuta, se argumenti kryesor ishte kanabizimi i vendit. Një argument ky, jo ligjor.”
Po ashtu, avokati solli në vëmendje që pas marrjes së vendimit, mbrojtja e Tahirit u informua se gjyqtari Engert Pëllumbi ishte në konflikt interesi dhe duhej që të kishte kërkuar që të tërhiqej nga çështja.
Për gjyqtarin Pëllumbi në vitin 2014 vetë Saimir Tahiri kishte kërkuar ndëshkim për shkelje në 3 procese gjyqësore.
“Strategjia e mbrojtjes është duke u përgatitur. Rekursi që do i çojmë Gjykatës së Lartë ka edhe argumentet mbi shpërdorimin e detyrës, pezullimit të ekzekutimit të vendosur nga Gjykata e Apelit.
Tahiri është kujtuar nga mediat që paska pasur një shkresë drejtuar KLD për procedimin e gjyqtarit. Vlerësonim se ky gjyqtar duhet të kishte bërë kërkesë për t’u tërhequr nga procesi, ishte në shkelje shumë të rëndë të ligjit. Ka pasur problematika me Tahirin pra lifgjërisht ishte në konflikt interesi.”, tha ai.