Prej një viti në detyrë, as Drejtorja e Përgjithshme e Tatimeve, Delina Ibrahimaj, nuk guxon të dërgojë hetimin tatimor në koncesionin e bakrit “Nesco Metal”, me aktivitet në 10 miniera, uzina pasurimi, qendra përpunimi skrapi e deri bazë eksporti minerali në Fllakë-Durrës.
Shkak, nuk është paaftësia e saj profesionale, por lista që i kanë lënë mbi tavolinë ditën emërimit; në të cilën janë emrat e 50 koncesioneve e bizneseve VIP, që nuk do preken me kontrolle faktike; mes tyre dhe koncesioni i bakrit “Nesco Metal”, ku ortak është edhe Ilir Meta.
Ish-kryeministri Ilir Meta, duke e patur biznes të tij afatgjatë; me VKM nr. 602, datë 17.11.2000, në nenin 11 të kontratës koncesionare 30 vjeçare të datës 18.01.2001, ka përjashtuar këtë koncesion, nga pagesat tatimore, dogonare, TVSH, energji elektrike, karburante, ujë, taksa mjedisore dhe renta (taksa e fitimit).
Ja çfarë thotë neni 11/11.1, i kontratës: Mbështetja për Projektin
– Për afatin 5 vjeçar 2001-2006, Shoqëria koncesionare përjashtohet nga detyrimet e pagesës se taksave tatimore e doganore dhe TVSH-ja për makineritë, linjat që do të përdoren për investime.
– Përjashtohet nga taksa e fitimit për 5 vite të plota ushtrimore, duke filluar llogaritja e viteve, 90 dite pas hyrjes në fuqi të kësaj kontrate.
– Përjashtohet nga taksat tatimore doganore dhe TVSH-ja për makineritë, pajisjet dhe pagesat faturave për lënde ndihmëse djegëse e energjie, për objektet e koncesionit pas 5 viteve te para; në rast se koncesionari do kërkojë ta prodhoje vetë energjinë elektrike me TEC ose HEC privat.
Mirëpo, këto privilegje tatimore nuk i përkasin të kaluarës 2001-2006, por kanë vazhduar e vazhdojnë edhe sot, 19 vite pasi vendimit që ka firmosur Ilir Meta për koncesionin e bakrit; të cilin e ka në ortakëri me mafiozin turko-hebre Erol Kohen, arrestuar për vrasjen e ortakut të tij turk, Serkan Şahin (27 vjeç).
Sipas regjistrit të QKB, “fleta” e paraqitjes së bilanceve ekonomike të koncesionit “Nesco Metal”, ka mbetur më 7 korrik 2016, kur shteti i ka dhënë 594 milionë, 558 mijë e 268 lekë rimbursim TVSH;
Më pas, nuk ka asnjë raport tatimor mbi aktivitetin ekonomiko-financiar prodhim-eksport, paçka se në muajin mars, tatimet e kanë përfshirë në pagat luftës, me 213 pagesa 3 mujore.
E vetmja gjë që është në faqen zyrare, janë bilancet me humbje qysh nga viti 2007; ndërkohë që mineral bakri është nxjerrë e eksportohet pa pushim, duke u depozituar në Katund Fllakë-Durrës.
Referuar fakteve, bëhen dy pyetje logjike:
– Si është e mundur, të dalë me humbje koncesoni i bakrit, kur vetëm në vitet 2003-2016, ka nxjerr nga 850 mijë-960 mijë tonë mineral të pasur e të pastër, të cilin e ka eksportuar 100%?
– Si është e mundur, të dalë me humbje, kur brenda 3 vitesh të gjoja fazës së investimit në 10 minierat dhe uzinat e bakrit; koncesionari ka marrë pa paguar as “1 cent” në shtetin shqiptar, 1 milion, 601 mijë ton mineral “stok”, të cilin e ka eksportuar në Turqi, Kosovë e Rusi.
Nisur prej leverdisë në përfitimin e metaleve të çmuara që ka minerali i bakrit të Shqipërisë, me përbërje 1,62% Cu, 0,66% Zn, 33,35% S e 1,63 gr/ton Au e 12,3 gr/ton Ag.; Ilir Meta-Kryetar Kuvendi në pushtetin “Rilindja”, inskenoi zgjatjen e afatit me Ligj nr. 73/2017, datë 27. 04.2017.
Përse Ilir Meta e bëri këtë shtyrje afati të koncesionit, nga 30 vite në 42 vite (31 dhjetor 2043)?!
Mos vallë e bëri për interes të ekonomisë kombëtare; apo për interesa të prodhimit të floririt e metaleve të çmuara; dhe të ardhurave miliona Euro nga eksporti i mineralit të bakrit; të cilin AKBN e shoqëron me letra analize sikur është mineral bakri i varfër.
NË VIJIM:
– Do publikojmë fakte konkrete, nga skema “lavatriçe” që koncesionari turk dhe ortaku i tij Ilir Meta, kanë bërë me gjoja shpenzimet për investimet, për të fshehur të ardhurat e mos paguar detyrime fiskale.
– Do publikojmë fakte nga “libri tatimor bosh” i këtij biznesi, që nuk po e mbush me të dhëna, as shefja e aktuale e tatimeve, Delina Ibrahimaj; e cila ashtu si parardhësit e 15 viteve të fundit, nuk lejon hetimin tatimor në koncesionin e bakrit. Pse?!/Pamfleti