Epidemiologu Skënder Murtezani, i cili është licensuar për vaksinën kundër COVID-19 ka shpjeguar efektet anësore që mund të ketë tek disa pacientë.
Në një lidhje me Skype nga SHBA, epidemiologu është shprehur optimist se me vaksinimin do të arrijmë ta mposhtim këtë luftë biologjike.
“Janë të kategorizuara shtresat që janë të riskuara pak sidomos ata që kanë qenë në spital me ndonjë alergji të vështirë, ku kanë patur nevojë të merren masa urgjente. Duhet më shumë kujdes nën mbikëqyrje para se të marrin vaksinën. Të dyja vaksinat mund të japin efekte anësore që ndodhin mes 12-14 orëve.
Këto efekte janë njësoj si ato të vaksinës së gripit, pak me temperaturë, dhimbje në vendin e injektimit, pak këputje. Fundi është i dobishëm dhe shumë efektiv, ne kemi shpresë të madhe që do të lirohemi nga ky ankth dhe nga kjo luftë biologjike me vaksinimin“, u shpreh ai.
I pyetur se përse duhet të merren dy doza të vaksinës anti-COVID, ai tha:
“Zakonisht me dozën e parë nuk mund të arrijë qëllimin e ngritjes së antitrupave në nivelin e nevojshëm prandaj jepet një sinjal në fillim. Qelizat e para fillojnë të krijojnë qelizat imune që mund ta njohin virusin që ka hyrë në trup por i duhet dhe një ushtri më e madhe. Prandaj jepen dy vaksina sepse efektiviteti është më i madh.”, deklaroi epidemiologu.