Planet e opozitës për të shkaktuar trazira në Parlament në datën 13 shtator nuk do të realizohen. Partia Socialiste u shndërrua në “pengesë” të skenarëve opozitarë, duke shtyrë dekretin e Presidentit Ilir Meta për teatrin.
Sipas informacioneve, ky dekret ishte vendosur që të diskutohej dhe votohej në Parlament në datën 13 shtator, por dje u vendos që të shtyhej.
Në orën 12:00 u mblodh në Kryesinë e Kuvendit Konferenca e Kryetarëve. Sipas burimeve, mbledhja u shoqërua me debate të ashpra mes dy palëve, ku opozitarët vijuan “refrenin” e krimit dhe bandave në vend, ndërsa u ndalën edhe tek çështja e teatrit. Pas mbledhjes, kryetari i grupit parlamentar të PD, Edmond Spaho, në një deklaratë për mediat nuk kurseu as paralajmërimet në lidhje me teatrin.
“Urova që mazhoranca të ketë kurajon të sjellin ligjin në Kuvend, të miratojë dekretin dhe të rrëzojë ligjin. Nëse nuk e kanë këtë vullnet, të kenë parasysh që siç tha Basha, me veprimet e tyre do ta çojnë vendin në një situatë ku paqëndrueshmëria politike do të jetë tipari kryesor i raporteve mes mazhorancës dhe opozitës”, tha ai.