Presidentja e Kosovës, Vjosa Osmani, priti me nderime të larta homologun e saj kroat, Zoran Milanoviç. Palët diskutuan një sërë çështjesh në takim.
Në konferencën për shtyp, zbuluan qëndrimet e tyre. Fillimisht për Ballkanin e Hapur, nismën rajonale të Shqipërisë, Serbisë dhe Maqedonisë së Veriut.
“Derisa Serbia ka rol kyç në këtë indikativë dhe nuk e njeh Kosovën natyrisht që ne nuk mund të presim nga presidenti Vuçiç që ka qëllime të mira në raport me shtetin tonë apo në raport me rajonin sepse vetë militarizimi i Serbisë që po ndodh këto vitet e fundit dhe tendencat e tyre destabilizuese në raport me shtetet e rajonit tregon që cili është qëllimi i tyre i vërtetë”, u shpreh Osmani.
“Nëse kjo iniciativë nuk e trajton Kosovën si të barabartë, atëherë detyrimisht është e pakuptimtë. Serbia duhet të vendosë vetë se çfarë dëshiron me këto marifete me Ballkanin e Hapur. Nuk është më viti 1914. Është diçka e mirë, njerëzit duhet të udhëtojnë lirshëm, por pa Kosovën, qëllimet janë të paqarta. Nuk janë shumë humane”, tha Zoran Milanoviç, president i Kroacisë.
Presidenti kroat një kritikë pati dhe për disa vende anëtare të Bashkimit Europian duke theksuar se nuk e kupton pse ende nuk e kanë njohur Kosovën. Gjithashtu ofroi një zgjidhje për dialogun mes Prishtinës dhe Beogradit. Milanoviç tha se Serbia duhet ta njohë Kosovën pasi ka ardhur koha përzgjidhje. Ndërkohë, gjatë qëndrimit në Prishtinë, ai u takua edhe me kryeparlamentarin, Glauk Konjufca si dhe me kryeministrin, Albin Kurti.