Kush është Lulzim Basha? D.m.th çfarë njeriu është, sa kapacitet ka, në çfarë beson, çfarë idesh përbëjnë formimin e tij? Ja disa pyetje që normalisht bëhen për një politikan që mëton të marrë pushtetin.
Fjala publike nuk mjafton, pasi politikanët gënjejnë, ata ndjekin rrymën. Një shembull: ata që besuan se Edi Rama është i majtë, tashmë ndoshta janë bindur për të kundërtën.
Për ta njohur kreun e opozitës, nuk mjafton as analiza.
Dikur Mister Buzëqeshjen e zbërthente si figurë inati dhe mëria për karrierën e shpejtë dhe qyl. Sot në ndihmë kanë ardhur ata që kanë humbur.
Astrit Patozi na rrëfen për kunatin dhe paradhomën e z. Basha. Topalli këmbëngul se ai është i paaftë, Imami thotë se Bashës i interesojnë vetëm paratë, Rama na thotë se “Basha është çun i mirë”… Edhe presidenti i Republikës, ky i tanishmi ka kontributin e vet në këtë drejtim. Sipas tij, z. Basha gënjen edhe për orën. Damir Fazlliç na tregon se Basha është një hiç, një tutkun politik, një budalla…
Puna është se në fillim z. Fazlliç duhet të na sqarojë se çfarë është ai vetë dhe kush është. Sepse ne realisht nuk e dimë. Për të është folur e shkruajtur shumë, është thënë se ka qenë lidhja serbe e Berishës, se ka futur hundët edhe në mbledhjet top – secret të atij që vazhdon quhet si Këshilli i Sigurisë Kombëtare.
Thirrja dhe dëshira e tij për të folur është sa problematike për të ashtuquajturat media, aq edhe shantazh për Bashën të cilit po i drejtohet dikush “që di ca gjëra”.
Dhe informacioni është pushtet. Z. Fazlliç nuk ngjan nga ata që ka mall për Shqipërinë dhe për median e saj. Ai është njeri i biznesit. Dhe një i tillë nuk flet pa interesa.
Nëse interesat e z. Basha i kanë lexuar të gjithë, nuk mund të thuhet e njëjta për ato të z. Fazlliç, sidomos në Tiranën e sotme.
