Lëvizja Socialiste për Integrim dhe aleatët e Partisë Demokratike kanë nisur tentativat për të krijuar grupe parlamentare.
LSI e drejtuar nga Monika Kryemadhi pësoi disfatën më të thellë në zgjedhjet parlamentare të 25 prillit, pasi mori vetëm 4 deputetë, nga 19 që kishte marrë në zgjedhjet e përgjithshme të vitit 2017. Por ky rezultat dhe pasja e vetëm 4 mandateve duket se ka vënë në vështirësi Lëvizjen Socialiste për Integrim në krijimin e grupit parlamentar.
Sipas ligjit dhe Rregullores së Kuvendit të Shqipërisë që një parti të krijojë grup parlamentar, duhet të ketë minimalisht 7 deputetë. Mirëpo, LSI-ja nuk e ka këtë numër dhe sipas informacioneve nga selia blu, ka trokitur pranë PD për t’i marrë të paktën 3 deputetë hua, në mënyrë që në shtator të këtë grupin e saj.
Po ashtu, mësohet se të njëjtën strategji si Lëvizja Socialiste për Integrim po ndjekin edhe krerët e partive aleate, të cilët Basha i futi në listat fituese të Partisë Demokratike në zgjedhjet e 25 prillit, vendimi ky që iu dha atyre mundësinë që të zgjidhen deputetë.
Por të gjithë aleatët edhe nëse grupohen të gjithë bashkë, nuk e plotësojnë dot numrin 7, për të krijuar grup parlamentar. Kështu që edhe ata si LSI kanë nisur tentativat, ndërsa mësohet se i kanë kërkuar PD-së deputetë hua, për të krijuar grup parlamentar.
Demokratët dalin kundër, ja detajet
Megjithatë, kërkesa e Lëvizjes Socialiste për Integrim dhe aleatëve të Partisë Demokratike për të huazuar deputetë, duket se nuk është mirëpritur nga demokratët dhe sidomos baza e saj e udhëhequr nga krerët e degëve. Gazeta ka mësuar se kjo kërkesë ka shkaktuar debate në radhët e demokratëve, të cilët janë kundër dhënies së deputetëve hua, pasi për ta aleatët, qofshin këta tradicionalë apo LSI, punuan kundër dhe iu prishën punë në zgjedhjet e 25 prillit dhe për këto arsye ata nuk e meritojnë ndihmën e PD-së.
Mësohet se baza demokrate këtë shqetësim, ku kërkojnë që Basha të rishikojë raportet me aleatët dhe të mos iu ofrojë më mbështetje këtyre të fundit, sikundër është huazimi i deputetëve, do ta parashtrojnë dhe diskutojnë edhe në mbledhjen e Kuvendit Kombëtar, i cili do të mbahet të shtunën e 17 korrikut.
Ndërkohë nga ana tjetër, mësohet se insistimi i krerëve të partive opozitare për të huazuar deputetët nga PD, në mënyrë që të krijojnë grupe parlamentare është edhe lëvizje e mirëmenduar strategjike. Kjo pasi nëse një parti ka grup parlamentar, ajo përfiton benefite, duke filluar nga përfaqësimi në komisione parlamentare, Konferencën e Kryetarëve apo komisioneve të posaçme që ngrihen, deri në zyrë në ambientet e Kryesisë së Kuvendit të Shqipërisë.
Pra, të gjitha këto lëvizje tregojnë se Lëvizja Socialiste për Integrim dhe aleatët synojnë t’i kërkojnë Bashës deputetë hua për të krijuar grupe parlamentare. Sidoqoftë mbetet të shihet në ditët në vijim se çfarë qëndrimi do mbajë kryedemokrati Lulzim Basha me aleatët e Partisë Demokratike.