Kandidati për ‘Primaret’ e Rithemelimit në Sarandë, Armando Magllara është larguar zyrtarisht nga partia Demokratike. Lajmërimin e ka bërë nëpërmjet një reagimi në facebook ku pas shpalljes së rezultatit të ‘Primareve’ në Sarandë, ka sulmuar ashpër procesin, duke theksuar se nuk kishte pasur garanci për mbarëvajtje nga ana e Berishës apo e Nokës.
Mes të tjerash, ai tha se në gjithë vendin shumë pak njerëz besonin akoma se bëhej fjalë për Partinë Demokratike. Sipas tij askush prej drejtuesve të ‘Rithemelimit’ nuk ishte angazhuar për të pasur një proces të drejtë votimi dhe numërimi.
“Kam kërkuar garanci për drejtësi pasi PD sarande e ka uzurpuar fondacioni Soros (ka lidhje me koncensionin e Butrintit) ku unë kam qenë kundra. Kam kërkuar garanci tek Sali Berisha asgjë. Kam kërkuar garanci tek Flamur Noka asgjë. Kam kërkuar garanci tek Albana Vokshi asgjë. Etj etj (Disponoj të gjitha sms). Une doja të kontriboja për qytetin tim se e dua.
Unë jam rezident në Londer dhe pjesën qe do të jem ne Sarande do të kontriboj përsëri
Ne PD e gjithë Shqiperisë ka akoma pak njerëz që besojnë se ajo është Parti Demokratike. Nga sot largohem nga Partia Demokratike! Është koha të perkushtohem më shumë bizneseve. Falenderoj shumë, shumë ata qe patën besim tek unë. Neveris ata që punojnë me barbarët për shkatërrimin e këtij qyteti”- shkruan Magllara në reagimin e tij.
Në një prej komenteve të bëra ndaj miqeve të tij në facbook, Magllara shkruan se 50% e anëtarëve të kryesisë së PD në Sarandë, ishin të dënuar me burg dhe se anëtarët ishin porositur të mos e votonin.
Mbrëmjen e djeshme u mbyll numërimi për Primaret në Bashkinë e Sarandës ku kanë shkuar në balotazh dy kandidatët më të votuar, Ardit Cikuli me 582 vota dhe Spiro Vaso me 252 vota. Ndërkohë Armando Magllara arriti të siguronte vetëm 33 vota. 4 fleta votimi janë shpallur të pavlefshme.