Prej kohësh kryeministri Edi Rama ka paralajmëruar se do të padisë në gjykatë përfaqësues të opozitës, të cilët i akuzon për shpifje.
Seanca e parë që starton kështu edhe serinë e gjyqeve të paralajmëruara nga kreu i qeverisë ka nisur sot në gjykatën e Tiranës me paraardhësin e tij Sali Berisha.
Kreu i qeverisë ka paditur për shpifje ish-kryeministrin lidhur me deklaratat e këtij të fundit për shitje të detit fqinjëve grekë.
Si dëm moral ndaj akuzave kryeministri Rama ka kërkuar nga kundërshtari i tij politik shumën 100 mijë lekëve.
Gjithësej janë 40 padi që kryeministri Rama nga ngritur ndaj përfaqësuesve të opozitës, përmendim këtu kreun e PD, Lulzim Basha, apo ish deputetet Jorida Tabaku Ervin Salianji etj.
Në procesin e sotëm gjyqësor, avokatët mbrojtës të Berishës kanë kërkuar mbledhjen e të gjitha dosjeve nën akuzën e shpifjes në një.
Pasi dëgjoi palët gjyqtarja Fide Osmani, vendosi shtyrjen e seancën për më datën 11 prill.