Gazetari amerikan Peter Lucas i ka kushtuar një artikull të gjatë shpalljes “non grata” të ish-kryeministrit Sali Berisha. Lucas ka shkruar shumë libra për Shqipërinë komuniste dhe post-komuniste, ndërsa është ndalur gjatë tek vendimi i DASH kundër Berishës.
Në artikull ai përmend si burgun e Guantanamos ashtu dhe rrugët alternative që mund të ndjekë Berishë për t’u futur në Amerikë.
Me ironi ai u shpreh se kufiri me Meksikën është i gjithi i hapur dhe njerëzit hyjnë edhe nëse janë “non grata” duke kaluar në sektorë të papatrulluar. Por sipas tij, kjo është e dëmshme për azilkërkuesit dhe emigrantët që plotësojnë rregullat sistematikisht. “Persona “non grata”? Nuk i lejohet hyrja në SHBA? Që kur kemi filluar t’u ndalojmë njerëzve të hyjnë në Amerikë?
Kufiri ynë me Meksikën është i gjithi i hapur dhe shumë njerëz po hyjnë, qofshin ata “non grata” apo jo. Mjafton të shkojnë deri në kufi, të kalojnë një sektor të papatrulluar të lumit Rio Grande me një fëmijë të marrë me qira në krahë dhe ja ku bëhen amerikanë pa dokumente. Por e gjitha kjo është në dëm të azilkërkuesve të ligjshëm apo emigrantëve, të cilët presin radhën dhe zbatojnë rregullat”, është shprehur ai.
Ai tha se shpallja “non grata” e Berishës ishte një ngjarje e habitshme për ata që nuk janë ndjekës të zhvillimeve. Lucas u shpreh se ata që i ndjekin zhvillimet politike brenda Shqipërisë nuk u habitën aspak nga ky vendim pasi sipas tij ky reagim nga Amerika ishte i vonuar dhe duhej bërë më parë. “Për habinë e shumëkujt, veçanërisht të ndjekësve të zhvillimeve në Europë dhe Ballkan, javën e kaluar, DASH shpalli ish-kryeministrin e Shqipërisë, Sali Berisha, 76 vjeç, i cili i përket një vendi anëtar të NATO-s, person non grata.
Kjo do të thotë se ai nuk mund të hyjë më këtu, ndonëse në të shkuarën, kur ishte president, është pritur me krahë hapur. Ndërkohë që politikanët europianë mund të jenë habitur nga ky zhvillim, të tjerë që e njohin situatën politike në Shqipëri dhe në Ballkan, nuk u habitën aspak. Reagimi i tyre ishte: “Mrekulli! Por pse e vonuat kaq shumë këtë vendim””, tha ai.
Lucas komenton pasuritë e ish-kryeministrit
Ndërkohë më tej në artikull, Lucas e quan ironike mënyrën sesi Berisha dikur lavdërohej nga SHBA si reformator dhe sot nuk mund të shkelë më atje ku dikur pritej krahëhapur. Ai tha se ish-kryeministri mendohej si një figurë që do të sillte ndryshime edhe pse kjo nuk zgjati për shumë kohë. Sipas gazetarit, Berisha kishte qenë një komunist dhe nuk mundi t’i shpëtonte atij mentaliteti as kur erdhi në pushtet.
“Në mënyrë krejt ironike, njëherë e një kohë, Berisha është lavdëruar nga SHBA për faktin se konsiderohej si një reformator i cili po sillte ndryshime mjaft të rëndësishme në një vend i cili kishte qëndruar nën kthetrat e regjimit komunist për 40 vite me radhë. Por ky vullnet i mirë nga ana e tij nuk zgjati shumë kohë, për vetë faktin se Berisha, i cili në të shkuarën kish qenë kirurg zemre dhe komunist, e pati të pamundur të zhdukte tiparet e autoritarit dhe të korruptuarit, të cilat shfaqen në karakterin e çdo udhëheqësi komunist”, tha ai.
Lucas u shpreh se ish-kryeministri abuzoi shumë duke grumbulluar pasuri marramendëse për veten e tij, familjarët dhe miqtë ashtu siç kishin vepruar gjithë ish-komunistë të tjerë. Sipas tij burgu i Guantanamos nuk është aq i madh sa të mbajë gjithë politikanët e korruptuar që pasurohen gjatë natës. “Pasi ai erdhi në pushtet, abuzimet e tij ishin të panumërta.
Ai, familja dhe miqtë e tij grumbulluan pasuri marramendëse, ashtu siç kishin bërë edhe shumë ish-komunistë të tjerë në Ballkan, të cilët kishin ardhur në pushtet pas rënies së komunizmit. Ndërkohë që Berisha mund të jetë shënjestruar nga DASH, e vërteta është se burgu i Guantanamos nuk është aq i madh sa për të futur në të gjithë politikanët rebelë të Ballkanit të cilët u bënë të pasur brenda natës. Person “non grata”? Kjo gjë vlen vetëm për disa”, u shpreh Lucas.