Është thënë, se ndërtuesi Shkëlqim Beshiri financon “non grata” Shkëlzen Berishën, por e vërteta është se ai pastron miliardat e zeza të Zenit, familjes “Berisha” e klaneve mafioze ku është ortak.
Përveç dhëndrit Jamarbër Malltezi që u arrestua mbrëmë, “lavatriçja” me e madhe e miliardave të Shkëlzen Berishës, është Shkëlqim Beshiri, i cili po ndërton pallate, kulla e komplekse vilash në Tiranë, Durrës, Lalz, Vlorë e Himarë; për të cilat, tatimet, Drejtoria e Parandalim-Pastrimit të Parave, Anti-krimi Ekonomik dhe SPAK e dinë që nuk kalojnë në rrugë bankare, por nuk hetojnë se nga vijnë.
Provë janë objektet, pasuritë e shumta të Shkëlzenit, lidhja ekonomike me Shkëlqim Beshirin, faktet e shumta se ato kanë burim ryshfetet e marrë nga bizneset, doganierët, tatimorët, ndërtuesit, kryepolicët, ministrat, tokat e trojet që ka grabitur dhe me burim nga aferat kompleksi “Partizani”, Gërdec e CEZ DIA.
Provë për pastrim parash, është fakti që firma “LIM-EM Sh.p.k” me pronar në letra Shkëlqim Beshirin e biznes i Shkëlzen Berishës; firmë që në tatime deklaron të ardhura minimale si biznes i vogël familjar, madje në 3 vitet e fundit ka deklaruar humbje.
Anti-krimi e SPAK duhet ta hetojnë këtë shoqëri, mbasi vetëm nga Bashkia e Tiranës në 7 vitet e fundit ka marrë 22 leje ndërtimi për banim e biznes; nga Bashkia Durrës ka marrë 9 leje ndërtimi, nga bashkitë Vlorë, Himarë e Sarandë ka marrë 12 leje ndërtimi.
Ndërsa nga qeveria me firmën e Edi Ramës, ka marrë leje për 3 hotele në Himarë, dhe leje si investitor strategjik, për një kompleks vilash e pallatesh me sipërfaqe toke 119 hektarë në Lalz, ku 28 hektarë është pyll me pisha pronë shteti buzë detit; ndërsa ortakërinë e ka me ish-drejtorë e deputetë të PD, të lidhur në kontrabandë nafte e në ARMO me familjen “non grata”.
Nuk duhet lënë në harresë, as fakti që një ndër ndërtuesit që nuk përmend Saliu, është Shkëlqim Beshiri, sepse ai, qysh prej vitit 2007, ka qenë e është financues i familjes “Berisha”.
Ndërsa pas vitit 2013, u bë “lavatriçja” e miliardave të Shkëlzenit dhe krejt familjes “non grata”, me ndërtime nën logon e firmës “LIM-EM Sh.p.k”, e cila pas provave të dala muajin e fundit, ka fshirë skedën me të dhënat financiare në QKB.
Për të tërhequr vëmendjen nga këto lidhje krimi financiar me ndërtimet, Shkëlqim Beshiri po hiqet sikur merret vetëm me biznesin e kafe “Segafredo” dhe “Bar-KLAR&COFFEE” në Tiranë, ku çuditërisht, sipas pagesave të Thesarit të Shtetit, shefat e Drejtorisë së Parandalim-Pastrimit të Parave, bëjnë pritjet e shefave të partnerëve Anti-mafie Ekonomike të SHBA-BE.
Por drejtësia e re duhet ta hetoj familjen edhe se si po pastron miliardat në sektorin e ndërtimit, duke përdorur si maska biznese e persona me të kaluar të errët, si “Çimi i pallateve” të Zenit./Pamfleti