Partia Demokratike ka publikuar dje emrat e anëtarëve të rinj të Këshillit Kombëtar. Të shtunën u mblodh Kuvendi Kombëtar i PD, ku në fund u votua nga anëtarët për emrat që do të përbëjnë Këshillin Kombëtar.
Ajo që bie në sy është se Basha vijon të spastrojë partinë nga njerëzit e ish-kryeministrit Berisha.
Edhe pse shumë ish-ministra të Berishës janë në Këshill, shumë emra të tjerë besnikë të tij janë larguar. Arben Ristani nuk do të jetë më pjesë e Këshillit. Ky i fundit ka qenë kryetar i KQZ dhe njihet si njeri pranë Berishës, por Basha e ka larguar. Një emër që publiku nuk është se e njeh shumë është Shpresa Breçani. Kjo e fundit është mbesa e ish-kryeministrit Berisha.
Izet Haxhia në procesin kundër tij sa i takon vrasjes së Azem Hajdarit ka përmendur zonjën në fjalë ku shprehet se ajo është mbesa e Berishës dhe ishte ajo që e njoftoi se Haklajt ishin poshtë zyrës së tij. Ajo ka qenë deri tani pjesë e Këshillit, por nuk është më. Një emër tjetër është Alfred Ahmetcenaj.
Ky i fundit është kreu i grupit të zjarrit më 21 janar 2011 kur dhe u vranë 4 persona. Si duket Basha ka vendosur të distancohet nga kjo ngjarje, ku ai ishte ministër i Brendshëm. Një emër tjetër që njihet si besnik i Berishës është Mal Berisha.
Bëhet fjalë për një diplomat dhe ambasador gjatë kohës që Berisha ishte kryeministër. Edhe ai është larguar nga Këshilli. Po ashtu edhe ish-deputeti Astrit Veliaj nuk do të jetë në Këshill. Basha ka spostuar edhe Halim Kosovën, ish-ministër në kohën e Berishës.
Një tjetër figurë është Sahit Dollapi. Ai ka qenë drejtor i disa drejtorive të rëndësishme kur Berisha ishte kryeministër, por tani është hequr nga Këshilli Kombëtar i PD. Po ashtu mungojnë dhe disa anëtarë të kabinetit të Berishës shumë vite më parë.
Basha fut besnikët e tij
Nëse shihet me kujdes lista, kryedemokrati Basha është kujdesur që disa figura të vjetra të mbeten në parti. Emra si Genc Pollo, Gent Strazimiri, Gert Bogdani, Rajmonda Bulku, Myqerem Tafaj, etj., janë pjesë e Këshillit. Por ajo që bie në sy është e Basha ka futur shumë emra të rinj që janë pranë tij.
Bie në sy se janë pjesë e Këshillit shumë gazetarë televizionesh që mbulojnë PD. Po ashtu ka shumë figura të reja që njihen si mbështetës të Bashës. Mund të përmendim një figurë që ka dalë javët e fundit. Bëhet fjalë për Marash Logun, i cili mbrojti PD në KQZ e Kolegj për 25 prillin. Po ashtu ka dhe shumë figura tërësisht të reja që padyshim njihen si mbështetës të Bashës. Pra teksa Berisha nga njëra anë kërcënon sedo të rikthehet në krye të PD, Basha duket se ka shumë njerëz të tij në institucionet drejtuese të partisë.
Në Kryesi dominojnë njerëzit e tij. Nëse shohim Këshillin Kombëtar shumica janë mbështetës të Bashës. Kreu demokrat gëzon edhe mbështetjen e deputetëve të zgjedhur dhe të bazës, çka do të thotë se tashmë ka forcuar ndjeshëm pozitat në parti. Me votimin në Kuvend Basha mbylli çështjen e debateve në PD. Në shtator opozita futet në Parlament dhe nis një epokë e re në raport me mazhorancën. Rama kërkon bashkëpunim, Basha duket i tërhequr. Por mbetet të shihet se si do të vijojë sesioni i ri.