Partia Demokratike, me Sali Berishën dhe besnikët e tij, vazhdon të gënjejë dhe tallet me shqiptarët për çështjen e negociatave me Bashkimin Europian, duke thënë se ky i fundit ka shtyrë pa afat bisedimet me Shqipërinë.
Këtë gënjeshtër më së fundmi e përsëriti Flamur Noka gjatë një takimi me shqiptarë në Napoli të Italisë.
“Kreu i qeverisë në ikje premton dhe mendon me idenë se po i gënjen shqiptarët, duke tentuar t’i marrë për budallenj se mendojnë se janë dritshkurtër dhe nuk kanë memorie, por ju e dini më mirë se kushdo, shqiptarët e dinë më mirë se kushdo që ajo pasaportë është mbajtur peng nga krimi, që integrimi është mbajtur peng në 12 vite nga droga dhe korrupsioni që ka mbërthyer regjimin në pushtet. Edi Rama përpiqet t’i mashtrojë shqiptarët me pasaportën e Bashkimit Europian, por Europa pak ditë më parë vendosi të shtyjë pa afat bisedimet me Shqipërinë për 2 kapitujt e parë të integrimit. Pse? Sepse në Shqipëri qeveris krimi”,- gënjeu Noka.
Por për Report Tv në një reagim ekskluziv Komisioni Europian përgënjeshtroi Berishën dhe besnikët e tij duke thënë se nuk ka asnjë bllokim në procesin e negociatave të anëtarësimit me Shqipërinë.
Një zyrtar i Komisionit Europian i tha ekskluzivisht Report Tv se jo vetëm që nuk ka bllokim të negociatave, por po vijon puna për mbajtjen e konferencës së katërt ndërqeveritare, për të hapur zyrtarisht, ashtu siç ishte premtuar grupkapitujt, “Tregu i brendshëm” dhe “Konkurrueshmëria e rritja gjithëpërfshirëse”.
Për këtë, thotë zyrtari i Komisionit Evropian për Report Tv, janë duke vijuar diskutimet në Këshill, bazuar në propozimet e Komisionit. Ndërkohë, në reagim theksohet se po diskutohet hapja e të gjitha grupkapitujve.