Opozita e ka treguar ditën e djeshme hapur se meraku i saj më i madh është reforma në drejtësi. Më 16 shkurt Partia Demokratike, Lëvizja Socialiste për Integrim dhe parti të tjera të opozitës do të dalin të protestojnë, por deri më tani nuk është bërë e ditur se cili është motivi i kësaj proteste. Deputetët dhe baza janë të paqartë mbi të gjithë mënyrën e organizimit dhe skenarët e protestës, pasi siç,duket pas këtij tubimi fshihet diçka tjetër.
Sinjalet janë dhënë ditën e djeshme nga sekretari për Çështjet Ligjore në Partinë Demokratike, Çlirim Gjata, i cili ka sulmuar hapur reformën në drejtësi. Gjatë një prononcimi për mediat, Gjata hodhi akuza të forta në adresë të Komisionit të Pavarur të Kualifikimit, teksa deklaroi se organet e vetingut po përdorin standarde të dyfishta në rivlerësimin kalimtar të gjyqtarëve dhe prokurorëve.
Sekretari për çështjet ligjore, iu referua procesit të vetingut të drejtueses së Prokurorisë së Krimeve të Rënda, Donika Prela, për të cilën theksoi se ajo nuk duhet të qëndrojë më në këtë detyrë. Sipas tij, KPK duhet ta shkarkojë menjëherë Prelën, pasi ajo i është shmangur ligjeve të vendit duke mos paguar taksat. “Çështja është se çfarë deklaroi kjo zonjë para organeve të vetingut. Në momentin që zyrtari i ONM-së e pyeti Donika Prelën se pse bashkëshortin i saj nuk paguan taksa.
Ajo tha se nuk kemi të njëjtin standard, sepse Shqipëria nuk është vend i BE-së. Kjo ishte pak a shumë logjika e gjithë deklaratës së saj. Bashkëshorti i saj falet dhe nuk ka asnjë përgjegjësi kur nuk paguan taksa. Biznesmenët pa përkrahje politike, që nuk kanë lidhje me pushtetit, që i shërbejnë qytetarëve futen në burg. Kemi të bëjmë me një standard të dyfishtë në veting.
Kemi një shkelje të prokurores së Krimeve të Rënda, Donika Prelës, e cila nuk duhet të qëndrojë në detyrë vetëm për këtë shkak. Po ashtu, PD po skanon dhe po mbikëqyr çdo vendim të institucioneve të vetingut dhe organeve të reja të drejtësisë për të denoncuar çdo parregullsi apo anësi”, deklaroi ai. Po ashtu, Gjata akuzoi kryeministrin Edi Rama se ka ndërhyrë për ta mbajtur në detyrë zonjën Prela, e cila sipas tij, ka mbyllur dosjen e kryebashkiakut të Durrësit, Vangjush Dako.
“Pse falet në këtë mënyrë kjo zonjë? Problemi qëndron tek dosjet që ajo mban mbyllur në favor të pushtetit dhe Kryeministrit duke filluar nga dosja “339” e Vangjush Dakos që është kapur me përgjime duke shpërndarë para për të blerë dhe vjedhur vota në dy palë zgjedhjet e fundit”, nënvizoi Gjata.
Deputetët të paqartë mbi skenarët e protestës
Gazeta ka mësuar se deputetët dhe baza e opozitës, kryesisht Partisë Demokratike janë të paqartë mbi mënyrën e organizmit dhe skenarët e mundshëm sa i takon protestës së paralajmëruar të 16 shkurtit. Sipas informacioneve, mësohet se deputetët demokratë kanë shfaqur pakënaqësi ndaj lidershipit të PD, pasi edhe pse nga Basha u caktua një datë për protestë, nuk është përcaktuar ende vendi, ora dhe zhvillimi i saj.
Po ashtu, mësohet se deputetët kanë paqartësi edhe lidhur me ecurinë e protestës, pasi krerët e opozitës kanë bërë thirrje për revolta, ndërkohë që ligjvënësit nuk e dinë nëse tubimi i 16 shkurtit do të jetë paqësor apo i dhunshme, nëse do të bllokohen rrugët apo jo. Megjithatë, shqetësimi kryesor i deputetëve dhe bazës është motivi dhe slogani që do të udhëheqë protestën.
Mësohet se deputetët janë shumë të shqetësuar, shqetësimi të cilin e kanë ndarë edhe me lidershipin e PD, pasi nuk kanë ende dhe nuk dinë se si do t’i ftojnë qytetarët në protestë. Pra, thënë më troç, ata duan një arsye nga Basha që kur të shkojnë në takime me qytetarët, t’i motivojnë këta të fundit dhe t’i bindin që t’i bashkohen opozitës më 16 shkurt në protestë. /Rigels Seliman