Opozita shqiptare ka nisur një tjetër fushatë sulmesh ndaj reformës në drejtësi. Akuzat ndaj anëtarit të KLP, Bujar Sheshi për lidhje me ish-Sigurimin e Shtetit dhe seanca dëgjimore e prokurores Donika Prela kanë bërë që si PD, ashtu dhe LSI të sulmojnë ashpër vetë procesin e reformës, vetingun, organet e reja dhe madje ndërkombëtarët. Emra si Edi Paloka, Silva Caka, Ylli Manjani apo Luan Rama dje kanë qenë në unison duke sulmuar të gjitha aspektet e reformës.
Deputetja e LSI, Silva Caka, nuk kurseu as ndërkombëtarët. “‘Riciklimi i këllirave’: kjo është reforma në drejtësi e Edi Ramës. Tmerr pacipësi si kjo, s’na kanë parë sytë!!! Ne kujtuam se do zgjidheshin këta që kanë mbaruar jashtë, në krye të drejtësisë, kurse këta i zgjodhën edhe bashkëpunëtorë të sigurimit në gjimnaz, edhe studentë të sigurimit, edhe hetues të sigurimit, edhe 65 vjeç, pa një gjuhë të huaj, edhe mashtrues, që gënjejnë për mbiemrin, edhe shantazhues ndaj Autoritetit të Dosjeve, që thotë të vërtetën.
Ndërkombëtarët rrinë e vështrojnë reformën që vjen erë… Ndërsa ONM, merr miliona euro për të mbyllur sytë!?”, ka deklaruar dje deputetja e LSI. I ashpër ishte dhe nënkryetari Edi Paloka. Ai ka lëshuar akuza se reforma në drejtësi po kapet nga qeveria. “E kuptoni çfarë “reforme” e çfarë “drejtësie” po ngre Rama?!
Organet e Vetingut nxjerrin fshehtas dosjet e prokurorisë, prokuroria nxjerr po fshehtas dosje për anëtarët e komisioneve të vetingut. Spiune, të korruptuar, falsifikatore… Hedhin në media pisllëqet e njëri-tjetrit me të bëra e të pabëra. Shqiptarët shohin dhe e vetmja gjë që kuptojnë është se e ashtuquajtura “reformë në drejtësi” që do duhej të pastronte drejtësinë dhe nëpërmjet drejtësisë institucionet e tjera të shtetit, është qelbur vete nga koka tek këmbët.
Nuk ka si të ndodhë ndryshe kur fut duart e qelbura Edvini”, tha ai. Nuk ka mbetur pas as ish-ministri i Drejtësisë, Ylli Manjani, i cili tha: “L. H. (Lulzim Hamitaj), anëtar i KPK (vetingut) thirret për të dhënë shpjegime për një akuzë, nga prokuroria që do vetohet prej tij!!! “Karagjozë me mandat Kushtetues dhe me bekim ambasadash!. Të fala reformës në (zh)drejtësi!”.
Skenarët e opozitës
Me sulmet që po i bëhen reformës në drejtësi, opozita po jep sinjale të qarta se kush është qëllimi i vërtetë i protestave dhe skenarëve për të destabilizuar vendin. Sali Berisha ka kërkuar që të shkohet te skenari venezuelian, ndërsa Monika Kryemadhi deklaroi dy ditë më parë se do të rrethohet Kryeministria. Pra gjithë qëllimi i opozitës është të shkohet te detsabilizimi i vendit, me shpresën se reforma në drejtësi do bllokohet. Por si arrihet kjo? Opozita kërkon qeveri teknike dhe zgjedhje të parakohshme.
Shpresat e tyre janë që të shkohet te zgjedhjet e përkohshme dhe opozita të fitojë aty. Nëse ajo merr pushtetin, do kërkojë rishikim të ligjeve të reformës në drejtësi. Pra i gjithë meraku është reforma dhe nuk është qeveria. LSI është partia e cila është më e shqetësuar, pasi deputetët e saj kanë qenë ata që kanë sulmuar më ashpër reformën. Por absurdi është se LSI ishte partia që ndihmoi PS të votonte të gjitha ligjet.
Kodet dhe ligjet kryesore kërkonin 84 vota. Por PS dhe LSI kur ishin bashkë në pushtet kishin rreth 87 deputetë. Por sapo Meta u bë president dhe partia e tij doli në opozitë, LSI nisi sulmet duke mbështetur pretendimet e PD. Kjo fundit dërgoi në Kushtetuese si vetingun ashtu dhe shumë ligje të tjera. Interesant është fakti se ky reagim vjen në një kohë kur SPAK po ngrihet dhe sinjalet janë se paniku në politikë po rritet.
Kliti Topalli